रुसमा चरम इन्धन संकटपछि चिनियाँ विद्युतीय सवारीसाधनको मागमा उछाल

एजेन्सी । मस्कोको एउटा कार डिलरशिपलाई अहिले चिनियाँ विद्युतीय सवारी साधन (ईभी) को माग धान्न धौ–धौ परिरहेको छ ।

रुसी सवारी चालकहरू देशको ठूलो हिस्सामा व्याप्त इन्धन संकट, पेट्रोल पम्पहरूमा लागेको लामो लाइन र आकाशिएको मूल्यबाट बच्नका लागि विद्युतीय सवारीतर्फ आकर्षित भइरहेका छन् ।

हालैका हप्ताहरूमा रुसी ऊर्जा पूर्वाधारहरूमा युक्रेनले गरेको तीव्र आक्रमणका कारण ग्यासोलिन र डिजेलको आपूर्ति संकुचित भएको छ जसले गर्दा अधिकांश क्षेत्रमा इन्धन बिक्रीमा प्रतिबन्ध लगाइएको छ । रोयटर्सको गणना अनुसार, केही क्षेत्रमा खुद्रा ग्यासोलिनको मूल्य युरोपमै सबैभन्दा उच्च स्तरमा पुगेको छ ।

रुसको विशाल दूरी, कठोर जलवायु र सीमित चार्जिङ नेटवर्कका कारण यहाँको ईभी बजारको वृद्धि पहिले निकै सुस्त थियो । तर, बढ्दो इन्धन चुनौतीले गर्दा अहिले धेरै चालकहरू विद्युतीय सवारीमा जान बाध्य भएका छन् ।

चिनियाँ ब्रान्डहरूमा विज्ञता राख्ने ईएन कार्सका संस्थापक येभगेनी जाबेलिनका अनुसार, केही हप्ता अघिसम्म महिनामा दुई–तीन वटा मात्र ईभी बिक्री हुने गरेकोमा अहिले दिनमै दुई–तीन वटा बिक्री हुन थालेका छन् । इन्धनको स्थिति जटिल बनेपछि बजेट र प्रिमियम दुवै मोडलमा ग्राहकहरूको चासो कैयौं गुणाले बढेको उनले बताएका छन् ।

विद्युतीय सवारी र प्लग–इन हाइब्रिडको बिक्री परिमाण बढ्दै गए पनि यो अझै तुलनात्मक रूपमा न्यून नै छ । विश्लेषणात्मक निकाय अटोस्टाटका कार्यकारी निर्देशक सर्गेई उडालोभका अनुसार, उत्पादक र आयातकहरू यस ग्यासोलिन संकटका लागि तयार थिएनन् जसले गर्दा उनीहरूसँग पर्याप्त मौज्दात छैन ।

तर, यो संकट लामो समयसम्म कायम रह्यो भने निकट भविष्यमा बिक्रीमा उल्लेख्य वृद्धि हुने र त्यसको मुख्य फाइदा चीनलाई हुने उनले बताएका छन् । अहिले रुसी शोरुमहरूमा सम्भावित खरिदकर्ताहरू चिनियाँ अटो निर्माता जिलीद्वारा निर्मित इलेक्ट्रिक एसयूभीहरू अवलोकन गरिरहेका देखिन्छन् ।

यस वर्षको जनवरी र मे महिनाको बीचमा इन्धनको मूल्य अघिल्लो वर्षको तुलनामा १२ प्रतिशतभन्दा बढीले बढेपछि ईभीको माग पहिले नै बढ्न थालिसकेको थियो । अटोस्टाटका अनुसार, रुसमा सबैभन्दा धेरै बिक्री हुने ईभी र हाइब्रिड ब्रान्डहरूमा चिनियाँ निर्माताहरू जिली, डोङफेङ, जीएसी र चेरी रहेका छन् ।

रुसमै उत्पादन हुने शीर्ष ईभी मोडल इभोल्युट पनि वास्तवमा डोङफेङले उपलब्ध गराएको एसेम्बली किटबाटै निर्माण गरिन्छ । यस वर्षको पहिलो पाँच महिनामा करिब २४ हजार ६०० नयाँ प्लग–इन हाइब्रिडहरू बिक्री भएका छन् जुन अघिल्लो वर्षको तुलनामा १२५ प्रतिशतको वृद्धि हो ।

इन्धन अभावले गर्दा जुन महिनामा बिक्रीको गति अझ तीव्र भएको छ । अटोस्टाटका प्रमुख सर्गेई त्सिलिकोभका अनुसार, गत साता मात्रै १७ सय ५४ नयाँ प्लग–इन हाइब्रिडहरू दर्ता भएका थिए जुन अघिल्लो हप्ताको तुलनामा करिब एक तिहाइ बढी हो ।
रुसमा चार्जिङ स्टेसनहरूको संख्या पनि सन् २०२६ को जुलाईसम्मको एक वर्षमा २० प्रतिशतले बढेको छ । डिलरशिपमा भेटिएका भ्यासिली नामक एक ग्राहकले आफूले पहिले नै हाइब्रिड र ईभी किनेकोमा खुसी व्यक्त गरे ।

ग्रामीण भेगको निजी घरमा बस्ने उनले आफ्नै चार्जिङ स्टेसन जडान गरेका छन् यद्यपि मस्को जस्तो शहरमा राम्रोसँग चार्ज गर्नु अझै पनि चुनौतीपूर्ण रहेको उनले बताए ।

गत वर्ष रुसको कुल कार बिक्रीमा ईभी र प्लग–इन हाइब्रिडको हिस्सा मात्र ४.३ प्रतिशत थियो । तर, अहिले इन्धनको समस्याका कारण रुसीहरूले आफ्नो गाडीमा विशेष उपकरण जडान गरेर पेट्रोल र डिजेलको सट्टा सजिलै उपलब्ध हुने र सस्तो तरल प्राकृतिक ग्यास (एलएनजी) बाट चलाउन थालेका छन् ।

रुसी पत्रिका इजभेस्तियाले राष्ट्रिय ग्यास इन्धन संघलाई उद्धृत गर्दै यस्ता उपकरणहरूको प्रयोग गत वर्षको मार्च–अप्रिलको तुलनामा ३५ प्रतिशतले बढेको उल्लेख गरेको छ । यसले के देखाउँछ भने रुसी सवारी चालकहरू इन्धन संकटको दीर्घकालीन समाधानका लागि परम्परागत इन्धनबाट टाढिँदै नयाँ विकल्पहरू खोजिरहेका छन् ।