अमेरिका र चीनको भविष्य शानदार रहेको ट्रम्पको भनाइ

एजेन्सी । अमेरिकाका राष्ट्रपति डोनल्ड ट्रम्पले बिहीबार चिनियाँ राष्ट्रपति सी चिनपिङसँग कुराकानी गर्दै दुई देशको साथमा एक शानदार भविष्य हुने बताएका छन् ।

उनीहरूबीच बेइजिङमा इरान, व्यापार र ताइवान जस्ता जटिल मुद्दाहरूमा महाशक्ति शिखर सम्मेलन भइरहेको सन्दर्भमा ट्रम्पले यस्तो बताएका हुन् ।

आफ्ना होस्टको प्रशंसा गर्दै ट्रम्पले सीलाई ‘तपाईंको साथी हुनु मेरो लागि सम्मानको कुरा हो’ भने ।

उता सीले भने अलि कम उत्साहपूर्ण स्वरमा दुवै पक्ष ‘प्रतिस्पर्धी होइन, साझेदार हुनुपर्छ’ भने ।

सीले ट्रम्पलाई भव्य ग्रेट हल अफ द पिपलमा रातो कार्पेट, सैन्य ब्यान्डको धुन, सलामी र स्वागत छ भन्दै उफ्रिरहेका र नारा लगाइरहेका विद्यालयका बालबालिकाहरूका साथ भव्य स्वागत गरेका थिए ।

झण्डै एक दशकमा कुनै पनि अमेरिकी राष्ट्रपतिले गरेको यो पहिलो बेइजिङ भ्रमण हो । यो भव्य स्वागत समारोहले दुई देशबीच रहेका सुल्झन नसकेका थुप्रै व्यापारिक र भूराजनीतिक तनावहरूलाई ओझेलमा पारेको देखिन्थ्यो ।