तेल संकटका बीच साउदी अरामकोको पहिलो त्रैमासिक मुनाफामा २६ प्रतिशतको वृद्धि

एजेन्सी । साउदी अरामकोले आइतबार पहिलो त्रैमासिक नाफामा अघिल्लो वर्षको तुलनामा २६ प्रतिशतले वृद्धि भएको जानकारी दिएको छ जुन विश्लेषकहरूको अनुमानभन्दा बढी हो ।

अवरुद्ध हर्मुज जलयोजकलाई छलेर तेल पठाउन सकिने एउटा मुख्य पाइपलाइनले आफ्नो पूर्ण क्षमतामा काम गर्न थालेपछि कम्पनीलाई यो सफलता मिलेको हो ।

यो साउदी ऊर्जा कम्पनीले सीएनबीसीलाई दिएको जानकारी अनुसार, यस वर्षको पहिलो त्रैमासिकमा समायोजित खुद आम्दानी ३३.६ अर्ब डलर पुगेको छ जबकि गत वर्षको सोही अवधिमा यो २६.६ अर्ब डलर मात्र थियो । अघिल्लो त्रैमासिकको २५.१ अर्ब डलर नाफाको तुलनामा यो पटक ३४ प्रतिशतको उछाल देखिएको छ ।

विश्लेषकहरूले भने पहिलो त्रैमासिकमा ३१.२ अर्ब डलर मात्रै नाफा हुने अनुमान गरेका थिए ।

अरामकोका सीईओ अमिन नासेरले एक विज्ञप्तिमा भनेका छन्, ‘हाम्रो ईस्ट–वेस्ट पाइपलाइनले दैनिक ७० लाख ब्यारल तेल आपूर्ति गर्ने आफ्नो पूर्ण क्षमतामा पुगेर एउटा महत्त्वपूर्ण जीवनरेखाको रूपमा काम गरेको छ । यसले विश्वव्यापी ऊर्जा संकटको प्रभावलाई कम गर्न र हर्मुज जलयोजकको अवरोधका कारण मारमा परेका ग्राहकहरूलाई राहत दिन ठूलो मद्दत पुर्याएको छ ।’

इरानले हर्मुज जलयोजकमा गरेको नाकाबन्दीका कारण बजारमा करिब एक अर्ब ब्यारल तेलको अभाव भइसकेको छ । यो सामुद्रिक मार्ग जति दिन बन्द रहन्छ, अभावको समस्या उति नै गहिरिँदै गएको छ ।

पहिलो त्रैमासिकमा मात्रै ब्रेन्ट क्रुडको मूल्य ९५ प्रतिशतले बढेको थियो भने यस वर्षको सुरुदेखि अहिलेसम्म ६७ प्रतिशतको वृद्धि भइसकेको छ ।

पछिल्ला दुई हप्तामा प्रमुख तेल र ग्यास कम्पनीका सीईओहरूले लगानीकर्ताहरूसँगको कुराकानीमा इरान युद्धका कारण विश्वको ऊर्जा प्रणालीमा आमूल परिवर्तन आउने बताएका छन् । तेल क्षेत्रको ठूलो सेवा प्रदायक कम्पनी एसएलबीका सीईओ ओलिभियर ले पेउचका अनुसार, यस अवरोधले विश्वव्यापी ऊर्जा प्रणाली कति कमजोर छ भन्ने कुरा छर्लंग पारेको छ ।

अरामकोले पहिलो त्रैमासिकको अन्त्यमा आफ्नो गियरिङ रेसियो ४.८ प्रतिशत रहेको जानकारी दिएको छ ।

साथै, कम्पनीको सञ्चालक समितिले पहिलो त्रैमासिकका लागि २१.९ अर्ब डलर आधारभूत लाभांश अनुमोदन गरेको छ जुन अघिल्लो वर्षको तुलनामा ३.५ प्रतिशत बढी हो ।