इरान युद्ध अन्त्य हुने अपेक्षा सहित उकालो लाग्यो एसियाली बजार

एजेन्सी । पश्चिम एसियामा तनाव पुनः बढे पनि एसिया–प्रशान्त क्षेत्रका बजारहरूमा सुधार आउँदा बिहीबार जापानको सेयर बजार ५ प्रतिशतभन्दा बढीले बढ्यो । त्यहाँ बेन्चमार्क निक्केई २२५ इतिहासमै पहिलो पटक ६२,००० को बिन्दुमा पुग्यो ।

अमेरिकाका राष्ट्रपति डोनल्ड ट्रम्पले इरान शान्ति सम्झौतामा सहमत हुन असफल भए इरानमाथि अझ उच्च स्तरमा बमवर्षा गरिने चेतावनी दिएपछि पनि समग्र क्षेत्रीय बजारमा यो बढोत्तरी देखिएको हो ।

निक्केई २२५ मा ५ प्रतिशतको वृद्धि देखियो जसमा आधारभूत सामग्री, प्रविधि र वित्तीय क्षेत्रका सेयरहरूको नेतृत्व रहेको थियो । सूचकांकको प्रमुख हिस्सा ओगट्ने सफ्टबैंकको सेयर १३ प्रतिशतभन्दा बढीले बढ्यो ।

इलेक्ट्रोनिक्स कम्पनी इबिडेन १७ प्रतिशतको वृद्धिसहित सबैभन्दा उत्कृष्ट प्रदर्शन गर्ने कम्पनी रह्यो भने उत्पादन र धातु कम्पनी मित्सुई किनजोकुले १६ प्रतिशत लाभ हासिल गर्यो । रेनेसास इलेक्ट्रोनिक्सले १३ प्रतिशत जोड्दा रासायनिक तथा सामग्री फर्म तोसोह कर्पोरेसन १२ प्रतिशतले उकालो लाग्यो ।

टोपिक्स पनि २.३७ प्रतिशतले बढ्यो । अस्ट्रेलियामा एस एन्ड पी/एएसएक्स २०० ०.९ प्रतिशतले बढ्यो ।

दक्षिण कोरियाको कोस्पी सुरुवाती लाभ गुमाउँदै ०.६८ प्रतिशतले घट्यो भने साना कम्पनीहरूको कोस्डाक सूचकांक ०.५६ प्रतिशतले तल झर्यो । हङकङको ह्याङ सेङ सूचकांक १.४७ प्रतिशतले बढ्यो भने मुख्यभूमि चीनको सीएसआई ३०० ०.३८ प्रतिशतले बढ्यो ।

वाशिङटन र तेहरान युद्ध अन्त्य गर्नका लागि सम्झौताको नजिक पुगेको रिपोर्टहरू आइरहँदा ट्रम्पको यो नयाँ धम्की आएको हो ।

बजारको ताजा अवस्थाः
एस एन्ड पी/एएसएक्स २०० (अस्ट्रेलिया): ८,८६४.४० (+०.८१ प्रतिशत)
ह्याङ सेङ सूचकांक (हङकङ): २६,५७३.०३ (+१.३७ प्रतिशत)
कोस्पी सूचकांक (दक्षिण कोरिया): ७,५०५.६९ (+१.६४ प्रतिशत)
निक्केई २२५ (जापान): ६३,०४४.०० (+५.९३ प्रतिशत)
निफ्टी ५० (भारत): २४,३०६.६० (–०.१० प्रतिशत)
शाङ्हाई (चीन): ४,१७७.३१ (+०.४१ प्रतिशत)

अमेरिकी स्टक फ्युचर्समा खासै परिवर्तन देखिएन । एस एन्ड पी ५०० फ्युचर्स र नास्डाक १०० फ्युचर्स दुवै करिब ०.१ प्रतिशतले घटेका छन् । डाउ जोन्स इन्डस्ट्रियल एभरेजसँग सम्बन्धित फ्युचर्स ३५ अंक वा ०.१ प्रतिशतभन्दा कमले घटेको छ ।

हिजो राति अमेरिकामा पश्चिम एसियाको घटनाक्रमपछि सेयर बजार बढेको थियो । एस एन्ड पी ५०० १.४६ प्रतिशतले बढेर ७,३६५.१२ मा पुग्यो, भने नास्डाक कम्पोजिट २.०२ प्रतिशतले बढेर २५,८३८.९४ मा बन्द भयो ।

यी दुवै सूचकांकहरूले नयाँ उचाइ छोए र रेकर्ड स्तरमा बन्द भए । डाउ जोन्स इन्डस्ट्रियल एभरेज ६१२.३४ अंक वा १.२४ प्रतिशतले बढेर ४९,९१०.५९ मा बन्द भयो ।