हर्मुज पार गर्न इरानलाई पैसा तिर्ने कम्पनीलाई आर्थिक प्रतिबन्ध लगाउने अमेरिकाको चेतावनी

एजेन्सी । हर्मुज जलयोजकबाट सुरक्षित रूपमा आवतजावत गर्नका लागि इरानलाई भुक्तानी गरेमा ढुवानी कम्पनीहरूले प्रतिबन्धको सामना गर्नुपर्ने चेतावनी अमेरिकाले दिएको छ ।

शुक्रबार जारी गरिएको अमेरिकी अफिस अफ फरेन एसेट्स कन्ट्रोलको यस चेतावनीले पर्सियाली खाडीको मुखमा रहेको जलयोजकको नियन्त्रणलाई लिएर अमेरिका र इरानबीचको गतिरोधमा थप दबाब बढाएको छ । त्यहाँबाट सामान्यतया विश्वको तेल र प्राकृतिक ग्यासको व्यापारको करिब पाँचौं भाग ओसारपसार हुने गर्छ ।

फेब्रुअरी २८ मा अमेरिका र इजरायलले युद्ध सुरु गरेपछि जहाजहरूमाथि आक्रमण र धम्की दिँदै इरानले प्रभावकारी रूपमा यो जलयोजक बन्द गरेको थियो । पछि उसले केही जहाजहरूलाई आफ्नो तट नजिकका मार्गहरूबाट घुमाएर लैजाने गरी सुरक्षित मार्गको प्रस्ताव गर्न थाल्यो र कहिलेकाहीँ शुल्क समेत असुल गर्न थाल्यो ।

उक्त टोलबुथ (शुल्क संकलन) प्रयास नै अमेरिकी प्रतिबन्धको चेतावनीको मुख्य केन्द्र हो, जसमा भुक्तानीको मागमा नगद मात्र नभई डिजिटल सम्पत्ति, अफसेट, अनौपचारिक लेनदेन वा अन्य वस्तुगत भुक्तानीहरू समेत समावेश हुन सक्ने बताइएको छ । त्यसमा परोपकारी चन्दा र इरानी दूतावासहरूमा गरिने भुक्तानी पनि पर्छन् ।

इरानले जलयोजक बन्द गरेको जवाफमा अमेरिकाले अप्रिल १३ देखि इरानी बन्दरगाहहरूको जलसैनिक नाकाबन्दी गरेको छ जसले इरानी ट्यांकरहरूलाई बाहिर निस्कन रोकेको छ र आफ्नो कमजोर अर्थतन्त्र सुधार्न तेहरानलाई आवश्यक पर्ने तेल राजस्वबाट वञ्चित गरेको छ ।

नाकाबन्दी सुरु भएदेखि ४५ वटा व्यापारिक जहाजहरूलाई फिर्ता हुन भनिएको अमेरिकी सेन्ट्रल कमान्डले जनाएको छ ।