भेनेजुएला सैन्य कारबाहीमा बाजी लगाएर ४ लाख डलर जित्ने अमेरिकी सैनिकविरुद्ध अभियोग दर्ता

एजेन्सी । भेनेजुएलाका पूर्व नेता निकोलस मदुरोलाई पक्राउ गर्ने गोप्य सैन्य अभियानमा संलग्न एक अमेरिकी सैनिकलाई पक्राउ गरिएको छ ।

ती सैनिकले मदुरो पक्राउ पर्ने जानकारी सार्वजनिक हुनुअघि नै सो सूचनाको आधारमा सट्टेबाजी गरेर अवैध रूपमा पैसा कमाएको आरोप लागेको छ ।

अमेरिकाको न्याय मन्त्रालयले ग्यानन केन भ्यान डाइक नाम गरेका सैनिकमाथि पोलिमार्केट नामको क्रिप्टो–आधारित प्रेडिक्सन प्लेटफर्ममा वर्गीकृत सरकारी सूचना प्रयोग गरी व्यापार गरेको अभियोग लगाएको छ । न्याय मन्त्रालयका अधिकारीहरूका अनुसार, यो स्पष्ट रूपमा इन्साइडर ट्रेडिङ (आन्तरिक सूचनाको अवैध प्रयोग) हो जुन संघीय कानुन अन्तर्गत अवैध मानिन्छ ।

भ्यान डाइक नर्थ क्यारोलिनाको फोर्ट ब्रागमा तैनाथ अमेरिकी सेनाका सक्रिय सैनिक हुन् । उनले भेनेजुएलाको सत्तापरिवर्तन र मदुरोको गिरफ्तारीसँग सम्बन्धित बजारहरूमा करिब ३३ हजार डलर दाउमा लगाएका थिए ।

मदुरो पक्राउ परेको खबर सार्वजनिक भएपछि उनले ४ लाख ९ हजार डलर (करिब ५ करोड ५० लाख नेपाली रुपैयाँ) भन्दा बढी मुनाफा आर्जन गरेका थिए ।

गत जनवरी ३ मा अमेरिकी विशेष सेनाले भेनेजुएलाको राजधानी काराकासमा एक नाटकीय रात्रिकालीन छापा मारेर निकोलस मदुरो र उनकी पत्नी सिलिया फ्लोरेसलाई नियन्त्रणमा लिएको थियो । अपरेसन एब्सोल्युट रिजोल्भ नाम दिइएको सो अभियानपछि उनीहरूलाई लागूऔषध र हातहतियार सम्बन्धी मुद्दा चलाउन न्युयोर्क ल्याइएको छ ।

अभियोगपत्रका अनुसार, भ्यान डाइक डिसेम्बर २०२५ देखि जनवरी २०२६ सम्म सो अभियानको योजना र कार्यान्वयनमा संलग्न थिए र उनीसँग अभियानका सबै गोप्य र संवेदनशील जानकारीहरू उपलब्ध थिए ।

सट्टेबाजीका लागि प्रयोग गरिएको प्लेटफर्म पोलिमार्केटले असामान्य गतिविधि फेला पारेपछि न्याय विभागलाई जानकारी दिएको थियो । कम्पनीले एक विज्ञप्ति जारी गर्दै भनेको छ, ‘इन्साइडर ट्रेडिङका लागि पोलिमार्केटमा कुनै ठाउँ छैन । आजको पक्राउले हाम्रो प्रणालीले काम गरिरहेको पुष्टि गर्छ ।’

कार्यवाहक अमेरिकी महान्यायाधिवक्ता टोड ब्लान्चले भनेका छन्, ‘हाम्रा सैनिकहरूलाई सैन्य अभियान सुरक्षित र प्रभावकारी बनाउन गोप्य सूचनाको विश्वास गरिन्छ । उनीहरूलाई यस्तो संवेदनशील सूचना व्यक्तिगत वित्तीय लाभका लागि प्रयोग गर्न प्रतिबन्ध छ ।’

यो घटनाबारे सोधिएको प्रश्नमा राष्ट्रपति डोनाल्ड ट्रम्पले आफू यस्तो सट्टेबाजीका कुराहरूको पक्षमा नरहेको बताएका छन् । उनले भने, ‘दुर्भाग्यवश पूरै संसार एउटा क्यासिनो जस्तो भएको छ । युरोपदेखि सबै ठाउँमा यस्ता सट्टेबाजीका कामहरू भइरहेका छन् । म यसको पक्षमा कहिल्यै थिइनँ ।’

भ्यान डाइकमाथि सरकारी गोपनीयताको उल्लंघन, चोरी, कमोडिटी ठगी, वायर फ्रड र अवैध मौद्रिक कारोबार जस्ता धेरै गम्भीर मुद्दाहरू चलाइएको छ । सैनिक सेवामा प्रवेश गर्दा उनले कुनै पनि सैन्य सूचना सार्वजनिक नगर्ने सम्झौतामा हस्ताक्षर गरेका थिए जसको उनले उल्लंघन गरेको सरकारी दाबी छ । यो मुद्दाको सुनुवाइ न्युयोर्कको दक्षिणी जिल्ला अदालतमा हुनेछ ।