धितोपत्र बजारमा प्रणालीगत जोखिम न्यूनीकरण गर्ने सम्बन्धमा छलफल

काठमाडौं । नेपालको धितोपत्र बजारमा प्रणालीगत जोखिम न्यूनीकरण गर्ने सम्बन्धमा नेपाल धितोपत्र बोर्ड (सेबोन)मा समन्वयात्मक बैठक सम्पन्न भएको छ ।

नेपाल धितोपत्र बोर्ड, नेपाल स्टक एक्सचेन्ज लिमिटेड (नेप्से), सिडिएस एण्ड क्लियरिङ लिमिटेड तथा स्टक ब्रोकर्स एशोसिएशन अफ नेपालका प्रमुखहरू तथा प्रतिनिधिहरु उपस्थित भएको उक्त बैठकमा सेटलमेन्ट ग्यारेन्टी फन्डको सञ्चालन संरचना, कोष व्यवस्थापन प्रक्रिया तथा कार्यान्वयनको लागि अपनाउनुपर्ने कार्यको समयसीमा सहितको कार्ययोजनामा छलफल भएको थियो ।

सेटलमेन्ट सुनिश्चितता सुदृढ गर्ने र लगानीकर्ताको विश्वास अभिवृद्धि गर्ने उद्देश्यले जोखिम व्यवस्थापन, डिफल्ट व्यवस्थापन तथा सम्बन्धित निकाय र धितोपत्र व्यवसायीहरूको भूमिका सम्बन्धी विषयमा सरोकारवालाहरूले आआफ्ना धारणा राखेका थिए ।

बोर्डले बजार स्थायित्व सुनिश्चित गर्न तथा लगानीकर्ताको हित संरक्षणका लागि सेटलमेन्ट ग्यारेन्टी फन्डको प्रभावकारी कार्यान्वयनका लागि आयोजना गरेको उक्त बैठकमा नेप्से र सीडीएससीले प्रणाली तथा क्लियरिङसम्बन्धी तयारी प्रस्तुत गरेका थिए । त्यसैगरी एशोसिएशनले बजार सञ्चालनको व्यवहारिक अनुभवका आधारमा सुझावहरू प्रदान गरेको थियो ।

सेटलमेन्ट ग्यारेन्टी फन्डको सहज र प्रभावकारी कार्यान्वयनका लागि थप प्राविधिक छलफलहरू गर्दै समन्वयात्मक रूपमा अघि बढ्ने बैठकको निष्कर्ष रहेको थियो ।