भारतको दार्जीलिङमा पहिरो जाँदा १७ जनाको मृत्यु

एजेन्सी । भारतको पश्चिम बंगालमा रहेको दार्जीलिङमा मुसलधारे वर्षापछि आएको पहिरोमा परेर १७ जनाको मृत्यु भएको छ ।

विपतका कारण दार्जीलिङबाट सिक्किम जाने बाटो बन्द भएको छ ।

उत्तरी बंगाल र सिक्किममा अविरल वर्षाका कारण सडक तथा अन्य पूर्वाधारमा भारी क्षति पुगेको छ । दार्जीलिङ, कालिम्पोङ र सिक्किममा स्थिति नाजुक रहेको बताइएको छ ।

रातभरि परेको पानीका कारण दुधियामा रहेको बालासन नदीको पुल भत्किएको छ । सिलिगुडी र मिरिकलाई जोड्ने त्यो पुल भत्किँदा आवागमन ठप्प भएको छ ।

खर्साङ नजिक हुसेन खोला क्षेत्रमा पनि पहिरो गएको छ ।

कालिम्पोङमा निरन्तर वर्षा भइरहँदा व्यापक क्षति भएको छ । थप पहिरो जाने सम्भावना रहेको अधिकारीहरू बताउँछन् । कैयौं सडकहरू अवरुद्ध छन् भने सञ्चार सुविधा पनि काटिएको छ ।

सिलिगुडी र सिक्किम जोड्ने वैकल्पिक बाटो नेशनल हाईजे ७१७ई मा पनि पहिरो गएपछि आवागमन रोकिएको छ । निरन्तर पानी परिरहेकाले उद्धारकार्यमा कठिनाइ आएको अधिकारीहरूको भनाइ छ ।

नदी नजिकका बासिन्दाहरूलाई उच्च सतर्कता अपनाउन भनिएको छ । सुरक्षाकर्मीहरूले परिस्थितिको निगरानी गरिरहेका छन् ।