ओलीको प्रतिवेदनमा यस्तो छ कांग्रेसको आलोचना

काठमाडौं । सत्तारुढ नेकपा एमालेको केन्द्रीय कमिटी बैठकमा अध्यक्ष केपी शर्मा ओलीले पेस गरेको राजनीतिक प्रतिवेदनमाथि छलफल सुरु भएको छ ।

पार्टी केन्द्रीय कार्यालयमा जारी बैठकमा अध्यक्ष ओलीले ४३ पेज लामो राजनीतिक प्रतिवेदन पेस गरेका छन् ।

प्रतिवेदनमा पछिल्लो समसामयिक राजनीति, सरकार गठन भएपछिको ६ महिने समीक्षा, सरकार सञ्चालन, अर्थतन्त्र लगायतका विषयमा उल्लेख गरिएको छ ।

प्रतिवेदनमा ओलीले सत्ता सहयात्री दल नेपाली कांग्रेसबारे उल्लेख गरेका छन् । नेकपा माओवादी केन्द्र र त्यसका अध्यक्ष पुष्पकमल दाहाल ‘प्रचण्ड’को चर्को आलोचना गरेका ओली कांग्रेसप्रति नरम देखिएका हुन् ।

कांग्रेसबारे ओलीको धारणा सकारात्मक र आलोचनात्मक दुवै छ । एकातिर कांग्रेससँगको ऐतिहासिक सहकार्यलाई स्मरण गर्दै राष्ट्रिय हितका लागि सहकार्यको सम्भावना औंल्याइएको छ । अर्कोतिर, कांग्रेसले पछिल्ला सहकार्यहरूमा देखाएको कमजोरी र यसबाट उत्पन्न अस्थिरतालाई पनि आलोचना गरिएको छ ।

ओलीद्वारा प्रस्तुत राजनीतिक प्रतिवेदनमा कांग्रेसलाई लोकतन्त्र स्थापनाका लागि महत्त्वपूर्ण भूमिका निर्वाह गर्ने दलका रूपमा उल्लेख गरिएको छ। विशेषतः २०४६ सालको जनआन्दोलन: कांग्रेस र एमालेको संयुक्त नेतृत्वले राणाशासनपछि मुलुकलाई बहुदलीय लोकतन्त्रतर्फ डोर्‍याएको उल्लेख गरिएको छ ।

२०६२/६३ को जनआन्दोलनमा राजतन्त्र अन्त्य र लोकतान्त्रिक गणतन्त्र स्थापनाका लागि कांग्रेस र एमालेबीचको सहकार्यलाई विशेष रूपमा स्मरण गरिएको छ। यी आन्दोलनहरूले कांग्रेस र एमालेलाई लोकतान्त्रिक आन्दोलनका अग्रगामी शक्तिहरूको रूपमा उभ्याएकोमा ओलीले जोड दिएका छन् ।

कांग्रेसलाई प्रतिस्पर्धी शक्ति भन्दै ओलीले सहकार्यमा जोड दिका छन् ।

प्रतिवेदनले कांग्रेसलाई मुलुकको प्रमुख प्रतिस्पर्धी शक्ति मान्दै यसलाई लोकतन्त्र, सुशासन, र राष्ट्रिय स्थिरताका लागि सम्भावित सहकार्यको साझेदारका रूपमा व्याख्या गरेको छ ।

कांग्रेस र एमाले दुवै मुलुकका प्रमुख राजनीतिक दल हुन् । प्रतिवेदनले यी दुई दललाई प्रमुख प्रतिस्पर्धी भए पनि आपसी सहकार्यले राष्ट्रिय हितका लागि सकारात्मक भूमिका खेल्न सक्छ भन्ने धारणा राखेको छ।

राष्ट्रिय एकता, संविधानको कार्यान्वयन, र लोकतन्त्र सुदृढीकरणमा कांग्रेससँग सहकार्य गर्न सकिने ओलीले उल्ले गरेका छन् ।

ओलीले कांग्रेसमाथि आलोचनात्मक विषयहरू पनि उठाएका छन् ।

कांग्रेसको आन्तरिक व्यवस्थापन र सहकार्यका नाममा गरिएको व्यवहारले कतिपय अवस्थामा राष्ट्रिय राजनीतिमा अस्थिरता निम्त्याएको कुरा प्रतिवेदनले परोक्ष रूपमा उल्लेख गरेको छ ।

कांग्रेसले माओवादी केन्द्रसँग मिलेर काम गर्दा देखा परेको राजनीतिक अस्थिरता, शासन व्यवस्थापनमा कमजोरी र विगतका सहकार्यबाट सिक्न नसकेको भन्दै आलोचना गरिएको छ।

प्रतिवेदनमा कांग्रेससँग सहकार्यलाई आवश्यकता र अवसरका रूपमा प्रस्तुत गरिएको छ।

कांग्रेससँग सहकार्य गर्दा स्पष्ट उद्देश्य, सर्त, र पारदर्शिता आवश्यक हुने कुरा प्रतिवेदनले औंल्याएको छ ।