आफ्नै घरमा बम विस्फोट हुँदा भूपु सैनिक घाइते

काठमाडौं । स्याङ्जाको चापाकोट नगरपालिका-४ पुरीगाउँस्थित एक घरमा सकेट बम बिस्फोट हुँदा एक व्यक्ति घाइते भएका छन् ।

नेपाली सेनाबाट अवकाश पाएका ४५ वर्षीय गोविन्द पुरीको घरमा सकेट बम विस्फोट भएको हो । बम विस्फोट भएर पुरी घाइते भएका छन्।

घरभित्रका पुराना भाडाहरु निकाल्ने क्रममा अचानक बम बिस्फोट भएको र विस्फोटबाट पुरीको बायाँ आँखा भन्दामुनि, बाँया खुट्टा र शरीरका केही भागमा चोट लागेको जिल्ला प्रहरी कार्यालय स्याङ्जाले जानकारी दिएको छ । पुरी २ वर्षअघि सेनाबाट अवकाश लिएका थिए ।

तर उनले घरमा किन बम राखेका थिए भन्ने विषयमा यकिन जानकारी आइसकेको छैन । जिल्ला प्रहरीले पुरीलाई नियन्त्रणमा लिएर उपचार गराएर अनुसन्धान गर्ने बताएको छ ।