चीनमा यसै वर्ष ७० प्रतिशतलाई खोप लगाइने

एजेन्सी । चीनमा लक्षित जनसंख्याको कम्तीमा ७० प्रतिशतलाई कोभिड-१९ विरुद्धको खोप यसै वर्ष अर्थात् सन् २०२१ भित्रै दिइने भएको छ ।

चिनियाँ स्वास्थ्य आयोगले सो कुराको जानकारी दिइएको हो ।

आयोगका प्रमुख झेङ यिक्सिनले सिन्ह्वालाई दिएको अन्तर्वार्तामा समुदायस्तरमा कोभिड–१९ का केही संक्रमणका घटना देखिएको बताउँदै त्यसले कोभिड–१९ को रोकथाम र नियन्त्रणमा थप सचेतता अपनाउन आवश्यक रहेको संकेत गरेको बताए ।

खोप कार्यक्रमका बारेमा आमजनतालाई हिच्किचाहट नराख्न आह्वान गर्दै प्रमुख झेङले खोपको ग्रेट वाल निर्माण गर्न जनता र सरकारबीच हातेमालो गर्न आवश्यक रहेको बताए ।

आयोगका अनुसार शनिबारसम्म चीनमा ७६ करोड ३० लाखभन्दा बढी डोज खोप लगाइएको छ । विश्वमै सबैभन्दा बढी खोप लगाउने मुलुक चीन नै भएको छ ।