काठमाडौं नयाँबानेश्वरका एक कोरोना संक्रमितको मृत्यु, कुल संख्या ३२ पुग्यो

काठमाडौं । स्वास्थ्य मन्त्रालयका अनुसार असार १७ गते कोरोना संक्रमित एकजनाको मृत्यु भएको छ । काठमाडौं नयाँ बानेश्वर बस्ने ८५ वर्षे पुरुषको अस्पतालको आइसोलेसनमा उपचारका क्रममा मृत्यु भएको हो ।

उनी छाती दुखेको र पिसाब कम भएको भन्दै उपचारका लागि अस्पतालमा भर्ना भएका थिए । उनी उच्च रक्तचापका र पार्किन्सन्सका बिरामी थिए ।

स्वास्थ्य मन्त्रालयका अनुसार पछिल्लो २४ घण्टामा ७४० जना नयाँ कोरोना संक्रमित थपिएका छन् । यसरी हालसम्म नेपालमा कुल कोरोना संक्रमितको संख्या १५ हजार २५९ पुगेको छ ।

मन्त्रालयका प्रवक्ता प्रा. डा. जागेश्वर गौतमका अनुसार हालसम्म उपचारपछि निको हुने कोरोना संक्रमितको संख्या ६ हजार १४३ जना पुगेको छ । जसमा पछिल्लो २४ घण्टामा मात्रै ८२३ जना उपचारपछि निको भएका छन् ।

हाल आइसोलेसनमा ९ हजार ८४ कोरोना संक्रमित छन् भने क्वारेन्टिनमा ३५ हजार ४७२ जना छन् । हालसम्म नेपालमा मृत्यु हुने कोरोना संक्रमितको संख्या ३१ छ । हालसम्म ३२ जनाको मृत्यु भएको छ ।