एक अर्बको आयो भीमदत्त नगरको बजेट

कञ्चनपुर । भीमदत्त नगरपालिकाले नमूना सहर बनाउने नीति र कार्यक्रमसहित आगामी आव २०७५-०७६ का लागि बजेट ल्याएको छ ।

भीमदत्त नगरपालिकाको तेस्रो नगर सभाबाट एक अर्ब १० करोड ६४ लाखको बजेट पारित गरिएको हो । चालू आर्थिक वर्षका लागि गतवर्ष एक अर्ब ६४ लाख बजेट विनियोजन गरिएको थियो ।

बजेटमा केही पुरानालाई निरन्तरता दिएर नयाँ नीति तथा कार्यक्रम समावेश गरिएका छन् । आगामी आवका लागि आन्तरिक आम्दानी १२ करोड २७ लाख प्रस्ताव गरिएको छ । वित्तीय समानीकरणबाट २५ करोड ५६ लाख, सशर्त अनुदान ३१ करोड ९५ लाख, राजश्व बाँडफाँट १४ करोड ३३ लाख, सामाजिक सुरक्षातर्फ १८ करोड, लागत सहभागितातर्फ एक करोड, क्षेत्रीय शहरी विकास आयोजना चार करोड ३५ लाख, सडक बोर्ड ७२ लाख र सीमाक्षेत्र विकास कार्यक्रमबाट ४५ लाख आम्दानी अनुमान गरिएको छ ।

आन्तरिक आम्दानीको छ करोड ४९ लाख साधारणतर्फ १८ लाख पूँजीगत, म्याचिङ फण्ड ७५ लाख, आय फिर्ता रु एक करोड २५ लाख र रु ५८ लाख विभिन्न कोषका लागि विनियोजन गरिएको छ ।

वित्तीय समानीकरणको बजेट वडा कार्यालयका लागि एक करोड ४८ लाख, नगरपालिका कार्यालयका लागि नौ करोड र पूँजीगतमा १४ करोड ५६ लाख विनियोजन गरिएको छ । राजश्व बाँडफाँडको अनुमानित आम्दानीलाई पूँजीगत खर्चमा विनियोजन गरिएको छ ।

भीमदत्त नगरपालिकाका नगर प्रमुख सुरेन्द्र विष्टको अध्यक्षतामा बसेको नगरसभामा उपप्रमुख सुशीलाचन्द सिंहले आगामी वर्षको नीति, कार्यक्रम तथा बजेट प्रस्तुत गरेका हुन् ।

बजेटमा नगर सभासद्ले आफ्नो धारणा राखेपछि नगर सभाबाट पारित गरिएको भीमदत्त नगरपालिका नगर कार्यपालिकाका प्रवक्ता राजेन्द्र पाण्डेयले जानकारी दिए ।

नगरपालिकाका प्रमुख विष्टले स्थानीय सरकार सञ्चालन ऐन २०७४ का आधारमा स्थानीय स्रोतसाधनको प्रयोग र जनशक्ति परिचालनबाट नगरपालिकालाई प्रदेश नं ७ को नमूना र व्यवस्थित शहर बनाउने नीतिसहित अल्पकालीन र दीर्घकालीन योजनासहित आगामी वर्षको नीति तथा कार्यक्रम बजेट ल्याइएको बताए ।

“सबै नगरवासीको सहयोगमा यो बजेट कार्यान्वयन गर्न चाहन्छाँै, यसमा सबैको साथ र सहयोग हुने आशा गरेका छाँै” नगर प्रमुख विष्टले भने । रासस