सुनसरी । सिप्रदियन सहायता संस्थाले विपद् पूर्वतयारी तथा उद्धार कार्यलाई थप प्रभावकारी बनाउने उद्देश्यले जिल्ला प्रहरी कार्यालय सुनसरीलाई विभिन्न उद्धार सामग्री हस्तान्तरण गरेको छ ।
जिल्ला प्रहरी कार्यालय सुनसरी परिसरमा आयोजित एक कार्यक्रमबीच संस्थाले रेस्क्यु बोट, लाइफ ज्याकेट, प्याडल, हेल्मेट तथा पेट्रोलबाट चल्ने चेन–स लगायतका विपद् उद्धार सामग्री सुनसरी प्रहरीलाई हस्तान्तरण गरेको हो ।
संस्थाबाट प्राप्त सामग्री बाढी, डुबान, हावाहुरी तथा अन्य प्राकृतिक विपद्का बेला उद्धार तथा खोज कार्यमा प्रयोग गरिने प्रहरीले जनाएको छ ।
उक्त कार्यक्रम सुनसरी प्रहरी प्रमुख एसपी केशव कुमार थेबेको अध्यक्षतामा सम्पन्न भएको थियो भने प्रतिनिधिसभा सदस्य दीपक कुमार साह प्रमुख अतिथिका रूपमा सहभागी भएका थिए ।
यसैगरी कार्यक्रममा सिप्रदियन सहायता संस्थाका प्रतिनिधिहरू तुलसीजंग बस्नेत, रजत श्रेष्ठ तथा बिमल गौतमलगायतको उपस्थिति रहेको थियो ।
कार्यक्रममा बोल्दै सुनसरी प्रहरी प्रमुख साहले नेपालजस्तो विपद्को उच्च जोखिम रहेको मुलुकमा उद्धार सामग्रीको पर्याप्त उपलब्धता र पूर्वतयारी अत्यन्त महत्वपूर्ण हुने बताए ।
उनले यस्ता सहयोगले प्रहरीको उद्धार क्षमता अभिवृद्धि हुनुका साथै विपद्का समयमा नागरिकलाई छिटो, सुरक्षित र प्रभावकारी सेवा प्रदान गर्न सहयोग पुग्ने विश्वास व्यक्त गरे ।
त्यस्तै, सुनसरी प्रहरी प्रमुख एसपी केशव कुमार थेबेले विपद्का बेला आवश्यक सामग्रीको अभाव चुनौतीका रूपमा रहने गरेको उल्लेख गर्दै सिप्रदियन सहायता संस्थाले गरेको सहयोग प्रशंसनीय रहेको बताए । उनले प्राप्त सामग्रीले जिल्लामा हुने विपद् उद्धार तथा खोज कार्यलाई थप प्रभावकारी बनाउन महत्वपूर्ण भूमिका खेल्ने धारणा राखे ।
प्रतिक्रिया