ट्रम्पमाथि किन हुन्छ बारम्बार भौतिक आक्रमणको प्रयास ?

एजेन्सी । गत अप्रिल २५ को रात वाशिङटनको सबैभन्दा उच्च–प्रोफाइल भेलाहरूमध्ये एक ‘ह्वाइट हाउस करस्पोन्डेन्ट्स एसोसिएसन’को रात्रिभोजमा गोली चल्दा अमेरिकी राष्ट्रपति डोनाल्ड ट्रम्प र सयौं पाहुनाहरूलाई त्यहाँबाट बाहिर निकाल्नुपर्यो ।

यस घटनाले एउटा कठोर यथार्थलाई उजागर गरेको छः झन्डै एक दशकदेखि बढ्दो खतराका बाबजुद उनी अझै पनि निरन्तर निशानामा छन् ।

धेरै हतियार बोकेका एक बन्दुकधारीले वाशिङटन हिल्टनको सुरक्षा जाँच चौकी (चेकपोइन्ट) नजिकै गोली चलाएका थि ए। उनले बुलेटप्रूफ ज्याकेट लगाएका एक सिक्रेट सर्भिस एजेन्टलाई घाइते बनाएका थिए र त्यसपछि उनलाई नियन्त्रणमा लिइएको थियो ।

अनुसन्धानकर्मीहरूका अनुसार ती व्यक्तिले ट्रम्प र उपराष्ट्रपति जेडी भ्यान्स लगायतका वरिष्ठ अधिकारीहरूलाई निशाना बनाएको देखिएको छ र उनलाई हत्याको प्रयास गरेको अभियोग लाग्न सक्छ ।

ट्रम्पमाथि एक र्यालीमा गोली प्रहार भएको दुई वर्षभन्दा कम समयमै घटेको यो घटनाले उनको पहिलो चुनावी अभियानदेखि नै सुरु भएको खतराको लामो शृंखलाप्रति पुनः ध्यान केन्द्रित गरेको छ ।

सबैभन्दा सुरुवाती घटनाहरू सन् २०१६ का हुन् जब ट्रम्पका र्यालीहरू विवादको केन्द्र बनेका थिए ।

मार्च महिनामा ओहायोको डेटनमा एक व्यक्तिले प्रहरी घेरा तोडेर मञ्चतर्फ दौडिने प्रयास गरेपछि उनलाई पक्राउ गरिएको थियो । त्यसको तीन महिनापछि लास भेगासमा ट्रम्पको भाषणका क्रममा अर्का एक व्यक्तिले प्रहरी अधिकारीको पेस्तोल खोस्ने प्रयास गरे र पछि उनले ट्रम्पको हत्या गर्ने आफ्नो उद्देश्य रहेको स्वीकार गरे ।

यी घटनाहरूले एक राष्ट्रपति पदका उम्मेदवारको वरिपरि अस्थिर सुरक्षा वातावरणको सुरुवात भएको संकेत गरेका थिए ।
ट्रम्पले कार्यभार सम्हालेपछि खतराका स्वरूपहरू अझ विविध भए ।

सेप्टेम्बर २०१७ः नर्थ डकोटाको मन्डानमा एक व्यक्तिले फोर्कलिफ्ट चोरी गरी राष्ट्रपतिको मोटरगेट (सवारी) तर्फ लैजाने प्रयास गरेपछि उनलाई पक्राउ गरियो ।

अक्टोबर २०१८ः ट्रम्पलाई रिसिन (विष) बनाउन प्रयोग गरिने कास्टर बीन्स भएको खाम पठाइयो । यस मामिलामा अमेरिकी जलसेनाका एक पूर्व सैनिकलाई पक्राउ गरिएको थियो ।

सन् २०२० सम्म आइपुग्दा यस्तै तरिकाहरू फेरि देखिए । सेप्टेम्बरमा एक क्यानेडियन नागरिकले ट्रम्पलाई चुनावबाट हट्न आग्रह गर्दै रिसिन मिसाइएको पत्र पठाइन् । उनलाई पछि पक्राउ गरियो ।

त्यसको एक महिनाअघि, अगस्टमा ह्वाइट हाउस बाहिर एक सशस्त्र व्यक्तिलाई गोली प्रहार गरिएपछि ट्रम्पलाई ह्वाइट हाउसको प्रेस ब्रिफिङबाट अचानक सुरक्षित स्थानमा लगिएको थियो ।

२०२४ः प्रत्यक्ष हिंसामा वृद्धि
वर्षौंसम्मका धम्की र असफल योजनाहरूपछि सन् २०२४ एउटा निर्णायक मोड साबित भयो ।

जुलाईमा अमेरिकी अधिकारीहरूले ह्युस्टनबाट आसिफ मर्चेन्टलाई पक्राउ गरे । उनीमाथि इरानको इस्लामिक रिभोलुसनरी गार्ड कर्प्सको तर्फबाट ट्रम्पको हत्या गर्न मानिसहरू भर्ना गर्ने प्रयास गरेको आरोप लगाइएको थियो ।

त्यसको केही दिनपछि सबैभन्दा गम्भीर आक्रमण भयो । पेन्सिलभेनियाको बटलरमा आयोजित एक र्यालीमा एक बन्दुकधारीले ट्रम्पलाई लक्षित गरी आठ राउन्ड गोली चलाए जसमा एउटा गोलीले उनको दाहिने कान छोएर गयो । आक्रमणकारी घटनास्थलमै मारिएका थिए ।

सेप्टेम्बर २०२४ मा फ्लोरिडाको ट्रम्प इन्टरनेशनल गल्फ क्लबमा ट्रम्प उपस्थित रहेकै बेला राइफल बोकेका अर्का एक व्यक्ति फेला परे । उनलाई पछि पक्राउ गरी जन्मकैदको सजाय सुनाइयो ।

ठूला घटनाहरू बाहेक साना तर निरन्तर रूपमा धम्कीहरू आइरहे ।

मे २०२५ मा, एक आइस अधिकारीले मेक्सिकन आप्रवासी भएको दाबी गर्ने एक व्यक्तिबाट हस्तलिखित पत्र प्राप्त गरे जसमा आगामी र्यालीमा ट्रम्पलाई गोली हान्ने धम्की दिइएको थियो । अगस्ट २०२५ मा वाशिङटन डिसीमा अर्का एक व्यक्तिलाई उनीविरुद्ध हिंसात्मक धम्की दिएको आरोपमा पक्राउ गरियो ।

अक्टोबर २०२५ मा सिक्रेट सर्भिस एजेन्टहरूले पाम बीच विमानस्थल नजिकै एउटा अग्लो हन्टिङ स्ट्यान्ड फेला पारे जहाँबाट एयर फोर्स वान पार्क गरिएको क्षेत्र प्रत्यक्ष देखिन्थ्यो । यसले निगरानी र पूर्वनियोजित निशानाको बारेमा चिन्ता बढाएको थियो ।
यो सिलसिला सन् २०२६ मा पनि जारी रह्यो ।

फेब्रुअरीमा, फ्लोरिडास्थित ट्रम्पको निजी निवास मार–ए–लागोभित्र छिरेका बन्दुक र ग्यास क्यानिस्टर बोकेका एक व्यक्तिलाई सिक्रेट सर्भिस एजेन्टहरूले गोली हानी मारेका थिए । मार्चमा मार–ए–लागो माथिको प्रतिबन्धित आकाशमा उडान भरेपछि एक नागरिक विमानलाई बीचमै रोकिएको थियो ।

त्यसको केही हप्तापछि अप्रिल २०२६ मा ह्वाइट हाउस करस्पोन्डेन्ट्स रात्रिभोजमा भएको गोलीकाण्ड अहिलेसम्मकै सबैभन्दा गम्भीर सुरक्षा उल्लंघन थियोः राष्ट्रपति, वरिष्ठ अधिकारीहरू र सञ्चारकर्मीहरू उपस्थित कार्यक्रममै गोली चल्नु ।

ओहायोमा पहिलोपटक सुरक्षा घेरा तोडिएको झन्डै एक दशकपछि पनि यो सिलसिला उस्तै छः खतराहरू कायमै छन्, विविध भएका छन् र समय–समयमा खतरनाक रूपमा ट्रम्प नजिक पुगेका छन् ।