भारतबाट स्विट्जरल्यान्ड जाने विमानमा आगलागी, ६ जना घाइते

एजेन्सी । दिल्लीबाट जुरिचका लागि उड्न लागेको स्विस एयरलाइन्सको विमानले उडान रद्द गरी आइतबार बिहानै इन्दिरा गान्धी अन्तर्राष्ट्रिय विमानस्थलको धावनमार्गमा यात्रुहरूलाई बाहिर निकालेपछि ६ जना यात्रुलाई अस्पताल भर्ना गरिएको छ ।

उडानका लागि धावनमार्गमा गुडिरहेको बेला विमानको एउटा इन्जिनमा खराबी आएर आगो लागेपछि यो घटना भएको हो । यसकारण चालक दलका सदस्यहरूले विमान रोकेर आपतकालीन उद्धार कार्य सुरु गरेका थिए ।

टीओआईको रिपोर्ट अनुसार, उडान संख्या एलएक्स१४७ को उक्त एयरबस ए३३० विमानमा चार शिशुसहित २३२ यात्रु र चालक दलका सदस्यहरू सवार थिए । भारतीय समयअनुसार बिहान करिब १ः०८ बजे धावनमार्ग २८ मा विमानले गति लिइरहेका बेला इन्जिनमा खराबी आएको थियो ।

फ्लाइट ट्य्राकिङ डेटाका अनुसार, चालक दलले उडान रद्द गर्नुअघि विमान १०४ नट्सको गतिमा पुगिसकेको थियो ।
यात्रु र चालक दलका सदस्यहरूलाई आपतकालीन स्लाइडको प्रयोग गरी बाहिर निकालिएको थियो । उद्धारका क्रममा ६ जना यात्रु घाइते भएका छन् र उनीहरूलाई उपचारका लागि मेदान्त अस्पताल लगिएको छ । विमान नहटाएसम्म धावनमार्ग बन्द रहनेछ ।

‘हामी दिल्लीमा उडान एलएक्स१४७ सँग सम्बन्धित घटनाबारे अवगत छौं । यसमा संलग्न विमान एयरबस ए३३० हो । स्विसले यसका लागि एक कार्यदल गठन गरेको छ । विमानमा २२८ यात्रु र ४ शिशुहरू थिए । उडान भर्नै लाग्दा स्थानीय समय अनुसार बिहान १ बजेपछि इन्जिनमा समस्या देखियो । चालक दलले उडान रद्द गरे र स्थितिको मूल्यांकनपछि सावधानीका रूपमा विमान खाली गराउने निर्णय गरे,’ स्विसले एक विज्ञप्तिमा भनेको छ ।

एयरलाइन्सले चालक दलका सदस्यहरू सकुशल रहेको पुष्टि गरेको छ । ‘६ जना यात्रुहरूले हाल उपचार पाइरहेका छन् र चालक दलका सदस्यहरू सकुशल छन् । सबै यात्रु र चालक दललाई आपतकालीन स्लाइडमार्फत विमानबाट बाहिर निकालिएको थियो । ६ जना यात्रुको अहिले स्वास्थ्य परीक्षण भइरहेको छ । स्लाइड प्रयोग गर्न नसक्ने केही व्यक्तिका लागि भने भर्याङको व्यवस्था गरिएको थियो ।’

स्विसले प्रभावित यात्रुहरूका लागि आवश्यक व्यवस्था मिलाइँदै गरेको बताएको छ । ‘यात्रुहरूलाई हाल सहयोग प्रदान गरिँदैछ । स्थानीय टोलीहरूले हाम्रा यात्रुहरूका लागि पुनः बुकिङ वा होटल आवासको व्यवस्था गर्न तीव्र रूपमा काम गरिरहेका छन् । हामी उनीहरूसँग भरपर्दो सम्पर्कमा रहनका लागि उनीहरूलाई सम्पर्क कार्डहरू दिइएको छ । यस्तो अवस्था सम्बन्धित सबैका लागि तनावपूर्ण हुन्छ । हाम्रा स्थानीय टोलीहरूले घटनास्थलमै यात्रुहरूको हेरचाह गरिरहेका छन् र उनीहरूसँग प्रत्यक्ष सम्पर्कमा छन् । हामी स्थानीय अधिकारीहरूसँग मिलेर काम गरिरहेका छौं ।’

एयरलाइन्सले यस घटनाको अनुसन्धान गरिने पनि थपेको छ । ‘यो घटना के कारणले भयो भन्ने कुरा पूर्ण रूपमा बुझ्न हामी दृढ छौं । स्विसका प्राविधिक विशेषज्ञहरू विमानको निरीक्षण गर्न र आगामी कदमहरू चाल्न दिल्ली जानेछन् । साथै, हामी सबै यात्रुहरूका लागि छिटो र उपयुक्त यात्राको विकल्प खोज्न तीव्र रूपमा काम गरिरहेका छौं । हाम्रा यात्रु र चालक दलको सुरक्षा सधैं हाम्रो पहिलो प्राथमिकता हो ।’