विश्व कूटनीतिमा पाकिस्तानको महत्त्व बढ्दा भारतको विदेश नीति फेल भएको विपक्षी कांग्रेसको भनाइ

एजेन्सी । पहलगाम आतंकवादी आक्रमणको पहिलो वार्षिकोत्सवमा भारतको विपक्षी दल कांग्रेसले बुधबार मोदी सरकारमाथि आक्रमण गर्दै असफल राज्य पाकिस्तानले अहिले नयाँ विश्वव्यापी प्रतिष्ठा प्राप्त गरेको र यसले प्रधानमन्त्री नरेन्द्र मोदीको विदेश नीतिको सारतत्वको पूर्ण असफलता झल्काएको दाबी गरेको छ ।

एक्समा पोस्ट गर्दै कांग्रेस महासचिव (सञ्चार विभाग प्रमुख) जयराम रमेशले अप्रिल २२ हरेक भारतीयका लागि सधैं ठूलो पीडा र तीव्र छटपटीको दिन रहने बताएका छन् ।

‘ठीक एक वर्षअघि पाकिस्तानद्वारा नियोजित पहलगाम आतंकवादी हमला भएको थियो । हाम्रो संवेदना शोक सन्तप्त परिवारहरूसँग छ । हामीले ती युवा स्थानीय पोनीवालाको बहादुरीलाई पनि स्मरण गर्छौं जो एक पर्यटकलाई बचाउने प्रयास गर्दा गोली लागेर मारिएका थिए,’ रमेशले भने ।

जम्मू र कश्मीरका उपराज्यपाल (एलजी) ले यो गुप्तचर निकायको असफलता भएको स्वीकार गरेको उनले दाबी गरे ।

‘यो स्वीकारोक्ति पछि के कारबाही गरियो भन्ने स्पष्ट छैन यद्यपि हत्याराहरूलाई केही महिनापछि कानुनी कठघरामा ल्याइएको थियो,’ रमेशले भने ।

उनले भने, ‘नोभेम्बर २००८ मा मुम्बईमा आतंकवादी हमला गरेपछि पाकिस्तान विश्वबाट एक्लिएको थियो ।’

‘पाकिस्तानको अर्थतन्त्र अझै पनि तहसनहस छ र बाह्य दाताहरूको सहयोगमा निर्भर छ । यसको राजनीति र समाजमा पृथक्तावादी आन्दोलनहरू गहिरो रूपमा जकडिएका छन् । यसको राजनीति भद्रगोल छ र देशमा सेनाले हुकुम चलाइरहेको छ,’ रमेशले भने ।

उनले थपे, ‘तैपनि आज त्यही असफल राज्य जसका सेनाप्रमुखले घातक घटना हुनुभन्दा केही दिन अघि मात्र भड्काउ र साम्प्रदायिक रूपमा उत्तेजक बयान दिएका थिए । त्यसले अहिले नयाँ विश्वव्यापी प्रतिष्ठा प्राप्त गरेको छ ।’

‘धेरै हिसाबले यसले प्रधानमन्त्रीको विदेशनीतिको सार र उनको कूटनीतिक संलग्नताको आत्म–प्रशंसनीय शैलीको पूर्ण असफलतालाई झल्काउँछ,’ रमेशले आरोप लगाए ।

‘के उनले यसलाई सुधार्नुपर्छ? पक्कै पनि, पर्छ । के उनले सुधार्नेछन् ? पक्कै पनि उनले गर्ने छैनन्,’ कांग्रेस नेताले भने ।

पाकिस्तानमा रहेको आतंकवादी समूह लश्कर–ए–तैयबाले गत वर्ष आजकै दिन जम्मू र कश्मीरको पहलगाममा आक्रमण गरेको थियो जसमा भारतभरका धेरैजसो पर्यटकसहित २६ निर्दोष मानिसहरूको ज्यान गएको थियो ।

पहलगाम आतंकवादी हमलापछि भारतले पाकिस्तान विरुद्ध ‘अपरेशन सिन्दूर’ नामक प्रतिशोधात्मक सैन्य कारबाही गरेको थियो जसमा भारतीय सशस्त्र बलले पाकिस्तान र पाकिस्तान नियन्त्रित कश्मीरमा रहेका सैन्य र आतंकवादी पूर्वाधारहरू नष्ट गरेको थियो ।