निषेधाज्ञा घोषणासँगै वायुसेवा कम्पनीले बढाए उडान संख्या, आज १२८ उडान हुँदै

काठमाडौं । सरकारले कोरोनाको बढ्दो जोखिम नियन्त्रण गर्न काठमाडौं उपत्यकालगायत विभिन्न जिल्लामा निषेधाज्ञा लागू गरेसँगै वायुसेवा कम्पनीले हवाई उडानको संख्या बढाएका छन् ।

काठमाडौंमा बिहीबारदेखि निषेधाज्ञा शुरु हुँदैछ । यसबीचमा मानिसहरु आफ्नो गन्तव्यमा सहजै पुग्न सकुन भन्ने उद्देश्यले उडान संख्या बढाइएको हो ।

सोमबार आन्तरिक उडानतर्फ १२३ वटा उडानबाट १२ हजार २५१ जना यात्रुले उडान भरेका थिए । काठमाडौंमा निषेधाज्ञा लागू हुने भएपछि हवाई यात्रुहरु बढेका छन् ।

विमानस्थलका अनुसार मंगलबार १२८ वटा उडान सेड्युल छन् । जसमध्ये बुध्द, यति, नेपाल एयरलाइन्स, सिता र श्री एयरलाइन्सले उडान संख्या थप गरेका छन् ।

जसमध्ये मंगलबार बुध्द एक्लै ६६ वटा उडान गर्नेछ भने यति एयरलाइन्सले ३२,  श्री एयरलाइन्सले १३,  नेपाल एयरलाइन्स, तारा र सूर्या४/४ उडान गर्दैछन् । साथै समिटले ३ र सिता एयरलाइन्सले २ उडान गर्दैछन् ।