एजेन्सी । सामसङ इलेक्ट्रोनिक्सले मंगलबार पहिलो मल्टी–फोल्डिङ स्मार्टफोन सार्वजनिक गरेको छ ।
फोन बजारमा आफ्नो पकड बलियो बनाउन सामसङले यो उत्पादन ल्याएको बताइएको छ । यस क्षेत्रमा प्रतिस्पर्धा थप तीव्र हुने अपेक्षा गरिएको छ ।
ग्यालेक्सी जेड ट्राईफोल्ड सार्वजनिक गरेर सामसङले चिनियाँ प्रतिस्पर्धीहरूमाझ आफ्नो स्थान सुदृढ गर्ने प्रयास गरेको छ । तर, उच्च मूल्य र उत्पादनसम्बन्धी चुनौतीका कारण फोल्डेबल उपकरणहरू अहिलेका लागि अझै थोरै मात्र ग्राहकको रोजाइमा पर्ने विश्लेषकहरू बताउँछन् ।
करिब साढे ३० लाख वोन (करिब २४ सय ४० डलर) मूल्य निर्धारण गरिएको यो मोडलमा तीनवटा प्यानल प्रयोग गरिएको छ । यो २५३.१ मिलिमिटर (१० इन्च) को डिस्प्लेमा फैलिन्छ र यो सामसङको नवीनतम फोल्डेबल ग्यालेक्सस् जेड फोल्ड सातभन्दा झन्डै २५ प्रतिशत ठूलो छ ।
‘फोल्डेबल बजार निरन्तर बढिरहनेछ र विशेषगरी ट्राईफोल्डले यस खण्डका महत्त्वपूर्ण भागहरूमा अझ विस्फोटक वृद्धि ल्याउने क्याटालिस्टका रूपमा काम गर्न सक्छ भन्ने मेरो मान्यता छ,’ सामसङ इलेक्ट्रोनिक्सका कार्यकारी उपाध्यक्ष तथा कोरिया सेल्स एन्ड मार्केटिङ कार्यालय प्रमुख एलेक्स लिमले बताए ।
लिमका अनुसार, नयाँ फोल्डेबल उपकरण गएको बिक्री बढाउने उद्देश्यका लागि नभई विशेषरूपमा यस्तो मोडल चाहने ग्राहकहरूलाई लक्षित गरेर निर्माण गरिएको हो ।
दक्षिण कोरियामा उत्पादन गरिएको ट्राईफोल्ड डिसेम्बर १२ देखि घरेलु बजारमा आउनेछ । अनि यस वर्षभित्रै चीन, सिंगापुर, ताइवान र संयुक्त अरब अमिरातमा उपलब्ध हुनेछ । अमेरिकामा यो आगामी वर्षको पहिलो त्रैमासिक बजारमा आउने हुने अपेक्षा छ ।
यो उपकरण सामसङको फ्ल्यागशिप मोडलहरूमा राखिएको सबैभन्दा ठूलो ब्याट्रीसहित आउँछ र ३० मिनेटमा ५० प्रतिशत चार्ज हुने सुपर–फास्ट चार्जिङ गर्छ ।
मेमोरी चिप र अन्य कम्पोनेन्टहरूको लागत तीव्र रूपमा बढिरहेकोले मूल्य निर्धारण कठिन निर्णय बनेको लिमले बताए ।
विश्लेषकहरूका अनुसार, ट्राइफोल्ड नयाँ प्रविधिको प्रदर्शनका लागि बनाइएको शोकेस पिस हो । यो ठूलो बिक्री गराउने फ्ल्यागशिप मोडल हैन ।
‘ट्राइफोल्ड पहिलो पुस्ताको उत्पादन हो र ट्राइफोल्ड डिजाइन पहिलोपटक व्यावसायिक रूपमा भित्र्याइँदैछ । त्यसैले अहिलेको अवस्थामा सामसङले ठूलो मात्रामा यसको उत्पादन गर्ने देखिँदैन,’ एनएच इन्भेस्टमेन्ट एन्ड सिक्युरिटीजका वरिष्ठ विश्लेषक र्यु यङ–होले भने ।
उनका अनुसार, सामसङको ग्यालेक्सी जेड फोल्ड लाइन सात पुस्तासम्ममा परिपक्व भइसकेको छ र यसको लागत संरचना कम हुँदै गएको छ । तर ट्राइफोल्डमा अझै पनि पूर्णता वा दिगोपनासम्बन्धी केही समस्या देखिन सक्छ । त्यसैले बजारले कसरी प्रतिक्रिया दिन्छ भनेर प्रारम्भिक मूल्यांकन महत्त्वपूर्ण हुने उनले बताए ।
फोल्डेबल स्मार्टफोन बजारमा प्रतिस्पर्धा तीव्र हुँदैछ । चीनको ह्वावेले गत सेप्टेम्बरमा उद्योगकै पहिलो ट्राईफोल्डिङ फोन ल्याएको थियो र एप्पलले पनि आगामी वर्ष आफ्नो पहिलो फोल्डेबल ल्याउने अपेक्षा छ । तर, उच्च मूल्य र ठूला मात्रामा उत्पादन गर्न सकिने सीमितताले यस क्षेत्रलाई विस्तारमा रोकेर राख्ने विश्लेषकहरू बताउँछन् ।
काउन्टरपोइन्ट रिसर्चका अनुसार, यो वर्ष फोल्डेबल फोनहरू सम्पूर्ण स्मार्टफोन बजारको २ प्रतिशतभन्दा कम रहनेछन् र सन् २०२७ सम्म पनि ३ प्रतिशतभन्दा तल नै रहने अनुमान छ ।
सामसङको फोल्डेबल बजारमा पठाउने हिस्सा तेस्रो त्रैमासमा ६४ प्रतिशत पुगेको काउन्टरपोइन्टले जनाएको छ । यो अघिल्लो त्रैमासिकको ९ प्रतिशतबाट ठूलो फड्को हो । यसले उत्पादन सार्वजनिक गर्ने समयअनुसार बजार हिस्सा कसरी तीव्र रूपमा हल्लिन सक्छ भन्ने देखाउँछ ।
फोल्डेबल स्मार्टफोन बजार यो वर्ष १४ प्रतिशतले बढ्ने र सन् २०२६ तथा २०२७ मा प्रतिवर्ष ३० प्रतिशतको हाराहारीमा वृद्धिदर रहने संस्थाले अनुमान गरेको छ । एप्प्ल पनि यस सेग्मेन्टमा प्रवेश गर्ने संकेत देखिन्छ ।
प्रतिक्रिया