नेकपा एमाले साधारण फलामको टुक्रा र धुलो पार्न सक्ने झुसे बारुलो शक्ति होइन : प्रधानमन्त्री ओली

काठमाडौं । प्रधानमन्त्री केपी शर्मा ओलीले नेकपा एमाले भाँचिने साधारण फलामको टुक्रा र धुलो पार्ने शक्ति नभएको बताएका छन् ।

मदन भण्डारीको ७४ औँ जन्म जयन्ती कार्यक्रमलाई शनिबार सम्बोधन गर्दै प्रधानमन्त्री ओलीले यस्तो बताएका हुन् ।

उनले भने, ‘दिउँसै टर्च बालेर खोज्दा नभेटिने गरी धुलो पार्छु भनियो । नेकपा धुलो पार्न सकिने शक्ति होइन । कसैले दर्शन ढुङ्गा चपाउँछु भनेर दाँत भाँच्छु भन्नु बेग्लै कुरा हो । तर, नेकपा एमाले साधारण फलामको टुक्रा होइन ।’

उनले नेकपा एमाले देख्दाको आकार जस्तो नभएर दुनियाँको वामपन्थी र कम्युनिस्ट आन्दोलनमा असाधारण शक्ति भएको पनि दाबी गरे । उनले एमाले झुसे बारुलो नभएको स्पष्ट पारे ।

‘चिल भनेको ठुलो सिकारी पक्षी हो, सानो चिबे भन्ने चराले लखेटेर हैरान बनाइदिन्छ । आकार मात्र हेरे हुँदैन । त्योसँग विचारको दम छ कि छैन । त्यसको उद्देश्यमा सहीपना छ कि छैन । त्यसको प्रतिबद्धता कस्तो छ । अनेक कुराहरू हुन्छन् । त्यहाँ सही नेतृत्व पनि हुन्छ । सही विचार अङ्गीकार गरेर हिँड्ने प्रतिबद्धता छ कि छैन भन्ने कुरा हुन्छ ।’

ओलीले छिमेकी राष्ट्र भारतसँग गरिएको महाकाली सन्धि सही भए पनि त्यसको बहानामा नेकपा एमालेमाथि प्रहारका साथै पार्टी फुटाउने सम्मको काम भएको बताएका छन् । प्रधानमन्त्री ओलीले अब यसलाई कार्यान्वयन गर्ने दिशामा आफू अघि बढ्ने स्पष्ट पारेका हुन् ।

ओलीले भने, ‘महाकाली सम्झौता कार्यान्वयन गर्न पञ्चेश्वर परियोजना पनि कार्यान्वयन गर्छौँ । सम्झौता अनुसार बिजुलीको पैसा लिइराखेका छौँ । पानी लिँदैछौँ, लिन्छौँ । सम्झौता अनुसार चाँदनी दोधारामा १० क्युबिक पानी लिन्छौँ । पहिले प्रधानमन्त्री हुँदा कुरा गरेको थिएँ । अब फेरि कुरा गर्छौँ ।

उनले नेकपा एमालेले राष्ट्रको सार्वभौम सत्ता, सम्प्रभुता, भौगोलिक अखण्डता, स्वाधीनता, स्वतन्त्रता र स्वभिनालाई अलिकति तलमाथि हुन नदिने स्पष्ट पारे । उनले बहुदलीय जनवादले यसलाई नसहने बताए ।

‘त्यो सम्झौता ठिक थियो । तर, त्यसबेला देश बेचे, नदी खोला बेचे भनेर भनियो,’ उनले गुनासो गरे । अर्को पटक पनि पार्टी फुटाए पनि त्यही मजबुतीका साथ एमाले पुनः फर्किएको उनको भनाई थियो ।