अलिबाबाले सिंगल डेमा गर्यो ७४ अर्ब डलरको व्यापार

चिनियाँ ई–कमर्श कम्पनी कम्पनी अलिबाबाले सिंगल डेको अवसरमा हालसम्मकै सबैभन्दा बढी ७४ अर्ब डलर अर्थात ८८ खर्ब रुपैयाँ बराबरको व्यापार गरेको छ ।

यो हालसम्मकै एकैदिन भएको सबैभन्दा ठूलो कारोबार हो । कम्पनीका अनुसार गत वर्षको सिंगल डेको तुलनामा २६ प्रतिशतले बढी व्यापार भएको हो ।

कोरोना भाइरसको महामारीका कारण अर्थतन्त्र संकुचित भएको अवस्थामा पनि रेकर्ड ब्रेक व्यापार हुनुलाई सकारात्मक रुपमा हेरिएको छ । गत वर्षको डिसेम्बर महिनाबाट चीनको वुहान प्रान्तबाट शुरु भएको कोरोना भाइरस यतिबेला विश्वभरी नै महामारीका रुपमा फैलिएको छ ।

तर चीनले भने कोरोना भाइरसको संक्रमण नियन्त्रणमा उल्लेख्य भूमिका निर्वाह गरेको देखिएको छ । पछिल्लो समय अन्य देशहरुको अर्थतन्त्र खुम्चिएको अवस्थामा चीनको अर्थतन्त्रमा तुलनात्मक रुपमा सकारात्मक नै देखिएको छ ।

नोभेम्बर ११ तारिख चिनियाँहरुका लागि सपिङ होलिडे हो । जुन अलिबाबाले सिंगल मानिसहरुका लागि लक्षित गरी शुरु गरेको थियो । अलिबाबाले भ्यालेन्टिाइन डे जोडीहरुका लागि लक्षित भए पनि यो दिन जोडी नहुनेहरुका लागि लक्षित गरी शुरु गरेको थियो ।

पश्चिमा देशहरुमा हुने ब्ल्याक फ्राइडे र साइबर मन्डेभन्दा बढी सिंगल डेको दिन बढी व्यापार हुन थालेको छ ।

अलिबाबाले गत वर्षको तुलनामा पछिल्लो एक वर्षमा कम्पनीको व्यापार १७ गुणाले बढेको बताएको छ । चीनभन्दा बाहिरका देशमध्ये अलिबाबाले अमेरिकामा मात्रै ५ अर्ब डलरभन्दा बढीको व्यापार गरेको छ ।