प्रहरीको उमेर हद अध्ययन गर्न गृहले गठन गर्‍यो कार्यदल

काठमाडौं । गृह मन्त्रालयले नेपाल प्रहरीको उमेर हद अध्ययनको लागि कार्यदल गठन गरेको छ ।

गृहमन्त्री स्तरीय निर्णयअनुसार गृह मन्त्रालयका सहसचिव एवं कर्मचारी महाशाखा प्रमुख झक्कप्रसाद आचार्यको संयोजकत्वमा सात सदस्यीय कार्यदल गठन गरिएको हो ।

कार्यदलमा नेपाल प्रहरी र सशस्त्र प्रहरी बल नेपालका डीआइजी, अर्थ मन्त्रालयका उपसचिव, गृह मन्त्रालयको कानुन उपसचिव, मन्त्रालयले तोकेको सुरक्षा विज्ञ र गृहका उपसचिव एवं प्रहरी कर्मचारी प्रशासन शाखा प्रमुख कृष्ण गैरे सदस्य रहेका छन् ।

समितिलाई मौजुदा ऐन, नियमहरूको अध्ययन गरी अन्य मुलुकका अभ्यासहरूसमेतको आधारमा सुझावसहितको प्रतिवेदन पेस गर्ने कार्यादेश दिइएको छ । समितिलाई एक महिनाको समय उपलब्ध गराइएको छ ।