क्रिकेट खेलाडीको पुरस्कार अझै आएन तर आशावादी छौँः कप्तान पौडेल

काठमाडौं । नेपाली राष्ट्रिय क्रिकेट टिमका कप्तान रोहितकुमार पौडेलले सरकारले क्रिकेट खेलाडीका लागि घोषणा गरेको पुरस्कार रकम अहिलेसम्म पनि नआएको बताएका छन् ।

एसियाड गेममा भाग लिन चीन उड्नुअघि आइतबार काठमाडौंमा बिदाइ कार्यक्रमपछि सञ्चारकर्मीसँग कुरा गर्दै कप्तान पौडेलले सरकारले घोषणा गरेको रकम बारम्बार भनिसकिएको र आउँछ भन्नेमा आशावादी रहेको बताएका हुन् ।

उनले एसियाड गेमका लागि नेपाली क्रिकेट टोलीले राम्रो तयारी गरिरहेको पनि बताए । ‘एसियन गेम्सलाई लिएर सबैजना एक्साइटेड छौं,’ उनले भने, ‘मेडल जित्ने लक्ष्य छ ।’

कमजोर वा बलियो दुवै टिमलाई कमजोर नठानी खेल्ने उनले बताए । यो खेलले टि २० विश्वकप छनोटका लागि पनि सहयोगी भूमिका खेल्ने उनको भनाइ छ ।

टि २० गेममा जुन टिमले डेथ ओभरमा उत्कृष्ट बलिङ गर्छ, त्यही टिमले खेल जित्ने भएकाले त्यसका लागि मेहनत गरिरहेको उनले बताए ।