एक वर्षमा अन्तरबैंक सापटीको ब्याजदर ३३००% ले बढ्यो

काठमाडौं । बैंकको ब्याजदर लगातार बढेको छ । जसले व्यावसायिक वातावरणमा अफ्ठ्यारो स्थिति सिर्जना गरेको छ । व्याजदर बढ्दा खासगरी उत्पादनमूलक क्षेत्रतर्फका उद्योगधन्धालाई बढी असर गर्छ ।

विगत एक वर्षको तथ्याङकलाई आधार मान्ने हो भने ९१ दिने ट्रेजरी बिल, वाणिज्य बैंककहरुको अन्तरबैंक ब्याजदर, कर्जाको भारित औसत ब्याजदर, निक्षेपको भारित औसत ब्याजदर र आधार दर निकै बढेको छ ।

नेपाल राष्ट्र बैंकका अनुसार एक वर्षको अवधिमा ९१ दिने ट्रेजरी बिलको औसत ब्याजदर ४८२.७५ प्रतिशतले बढेको छ । गत पुसमा ९१ दिने ट्रेजरी बिलको औसत ब्याजदर ०.८७ प्रतिशत रहेको थियो । एक वर्षको अवधिमा यो ४८२.७५ प्रतिशतले बढेर ५.०७ प्रतिशतले बढेको छ ।

यस्तै एक वर्षको अवधिमा वाणिज्य बैंकहरुको अन्तरबैंक ब्याजदर ३ हजार ३०० प्रतिशतले बढेको छ । गत आवको पुस मसान्तमा ०.१४ प्रतिशत रहेको अन्तर बैंक ब्याजदर अहिले ३३०० प्रतिशतले बढेर ४.७६ प्रतिशतमा पुगेको छ ।

यस्तै कर्जाको भारित औसत ब्याजदर ३.८५ प्रतिशतले बढेको र ९.४४ प्रतिशतमा पुगेको छ । गत आवको पुस मसान्तसम्म ९.०९ प्रतिशत रहेको थियो ।

निक्षेपको भारित औसत ब्याजदर पनि २७.४० प्रतिशते बढेको छ । गत आवको पुस मसान्तमा ५ प्रतिशत रहेको निक्षेपको भारित औसत ब्याजदर चालु आवको पुस मसान्तमा ६.३७ प्रतिशतमा पुगेको छ ।

बैंकहरुको आधार दर (बेसरेट) पनि १७.२७ प्रतिशतले बढेर ८.४२ प्रतिशत रहेको छ । गत आवको पुस मसान्तमा वाणिज्य बैंकको आधारदर ७.१८ प्रतिशत रहेको थियो ।

राष्ट्र बैंकले गरेको चालु आर्थिक वर्ष २०७८/०७९ को मौद्रिक नीतिको अर्धवार्षिक समीक्षामा उक्त कुरा उल्लेख छ । राष्ट्र बैंकका अुनसार पुस मसान्तसम्म वाणिज्य बैंकहरूको औसत आधार दर ८.४२ प्रतिशत, निक्षेपको भारित औसत ब्याजदर ६.३७ प्रतिशत र कर्जाको भारित औसत ब्याजदर ९.४४ प्रतिशत रहेको छ । पुस मसान्तसम्म आइपुग्दा तरलता अभावले अल्पकालीन र दीर्घकालीन दुबै ब्याजदरहरु बढेका छन् ।

कुन महिनामा कति ?

राष्ट्र बैंकका अुनसार चालु आवको पहिलो महिना अर्थात् साउनमा वाणिज्य बैंकहरुको अन्तर बैंक कारोबार ३ खर्ब ५ अर्ब ५५ करोड र अन्य वित्तीय संस्थाहरु (वाणिज्य बैंकहरुबीच बाहेक) को २७ अर्ब ९१ करोड गरी कुल ३ खर्ब ३३ अर्ब ४६ करोडको अन्तर–बैंक कारोबार भएको थियो । अघिल्लो साउनमा भने १ अर्ब र अन्य वित्तीय संस्थाहरुको ११ अर्ब ७१ करोड गरी १२ अर्ब ७१ करोड अन्तर बैंक कारोबार भएको थियो ।

गत साउनमा ९१–दिने ट्रेजरी बीलको भारित औसत ब्याजदर ०.६६ प्रतिशत रहेको थियो । अघिल्लो साउनमा भने ०.२१ प्रतिशत औसत ब्याजदर रहेको थियो ।

वाणिज्य बैंकहरुबीचको अन्तरबैंक कारोबारको भारित औसत ब्याजदर साउनमा २.१३ प्रतिशत रहेको थियो । तर, अघिल्लो साउनमा भने ०.२१ प्रतिशत रहेको थियो ।

वाणिज्य बैंकहरुको औसत आधार दर साउनमा ६.७१ प्रतिशत रहेको थियो । यता अघिल्लो साउनमा भने त्यो भन्दा बढी ८.०८ प्रतिशत रहेको थियो । साउनमा वाणिज्य बैंकहरुको निक्षेपको भारित औसत ब्याजदर ४.७६ प्रतिशत र कर्जाको भारित औसत ब्याजदर ८.४८ प्रतिशत रहेको थियो । अघिल्लो साउनमा यस्ता दरहरु क्रमशः ५.७७ प्रतिशत र १०.४७ प्रतिशत रहेका थिए ।

भदौमा वाणिज्य बैंकहरुको ५ खर्ब ५७ अर्ब ३० करोड रुपैयाँ र अन्य वित्तीय संस्थाहरु (वाणिज्य बैंकहरुबीचबाहेक) को ९१ अर्ब १ करोड सहित ६ खर्ब ४८ अर्ब ३१ करोड रुपैयाँको अन्तरबैंक कारोबार भएको देखिएको छ । अघिल्लो वर्षको सोही अवधिमा वाणिज्य बैंकहरुको ७ अर्ब ३८ करोड र अन्य वित्तीय संस्थाहरुको ३० अर्ब २४ करोड गरी कुल ३७ अर्ब ६२ करोड अन्तर बैंक कारोबार भएको थियो ।

भदौमा ९१-दिने ट्रेजरी बीलको भारित औसत ब्याजदर ३.९८ प्रतिशत रहेको तथ्याङकमा उल्लेख छ । अघिल्लो भदौमा यस्तो अंक ०.१३ प्रतिशत रहेको थियो ।

वाणिज्य बैंकहरुबीचको अन्तर–बैंक कारोबारको भारित औसत ब्याजदर भदौमा ४.७५ प्रतिशत रहेको थियो । तर अघिल्लो भदौमा भने ०.०८ प्रतिशत रहेको थियो । वाणिज्य बैंकहरुको औसत आधार दर भदौमा ६.८९ प्रतिशत रहेकोमा अघिल्लो भदौमा त्यो भन्दा बढी ७.८३ प्रतिशत रहेको थियो । गत भदौमा वाणिज्य बैंकहरुको निक्षेपको भारित औसत ब्याजदर ४.९२ प्रतिशत र कर्जाको भारित औसत ब्याजदर ८.५७ प्रतिशत रहेको थियो । अघिल्लो वर्षको सोही महिनामा यस्ता दरहरु क्रमशः ५.६१ प्रतिशत र १०.१८ प्रतिशत रहेका थिए ।

यस्तै असोजमा वाणिज्य बैंकहरुमा ७ खर्ब ९७ अर्ब २८ करोड रुपैयाँ र अन्य वित्तीय संस्थाहरु (वाणिज्य बैंकहरुबीच बाहेक) को १ खर्ब २२ अर्ब ६१ करोड सहित ९ खर्ब १९ अर्ब ८९ करोड रुपैयाँको अन्तरबैंक कारोबार भएको थियो ।

अघिल्लो वर्षको सोही अवधिमा वाणिज्य बैंकहरुको ३२ अर्ब १७ करोड र अन्य वित्तीय संस्थाहरुको ४८ अर्ब ९८ करोड गरी कुल ८१ अर्ब १५ करोड अन्तर बैंक कारोबार भएको थियो ।

असोजमा ९१–दिने ट्रेजरी बीलको भारित औसत ब्याजदर ४.८६ प्रतिशत पुगेको थियो । अघिल्लो असोजमा ०.६३ प्रतिशत रहेको थियो ।

वाणिज्य बैंकहरुबीचको अन्तरबैंक कारोबारको भारित औसत ब्याजदर असोजमा ४.९५ प्रतिशत रहेको थियो । अघिल्लो असोजमा ०.११ प्रतिशत रहेको थियो ।

यस्तै वाणिज्य बैंकहरुको औसत आधारदर असोजमा ७.५७ प्रतिशत कायम रहेको थियो । अघिल्लो असोजमा भने ७.७३ प्रतिशत रहेको थियो । असोज मसान्तसम्म आइपुग्दा वाणिज्य बैंकहरुको निक्षेपको भारित औसत ब्याजदर ५.४३ प्रतिशत र कर्जाको भारित औसत ब्याजदर ८.६९ प्रतिशत रहेको थियो । अघिल्लो वर्षको सोही महिनामा यस्ता दरहरु क्रमशः ५.४५ प्रतिशत र ९.८३ प्रतिशत रहेको थियो ।

यस्तै कात्तिकसम्म आइपुसग्दा वाणिज्य बैंकहरुले १० खर्ब ४३ अर्ब २२ करोड र अन्य वित्तीय संस्थाहरु (वाणिज्य बैंकहरुबीच बाहेक) को १ खर्ब ५८ अर्ब ४० करोड गरी कुल १२ खर्ब १ अर्ब ६२ करोडको अन्तरबैंक कारोबार भएको छ ।

अघिल्लो वर्षको सोही अवधिमा वाणिज्य बैंकहरुको ७१ अर्ब ८८ करोड र अन्य वित्तीय संस्थाहरुको ६१ अर्ब २० करोड गरी कुल १ अर्ब ३३ अर्ब ८ करोड अन्तर बैंक कारोबार भएको थियो ।

कात्तिकमा ९१-दिने ट्रेजरी बीलको भारित औसत ब्याजदर ४.८१ प्रतिशत रहेको छ । वाणिज्य बैंकहरुबीचको अन्तरबैंक कारोबारको भारित औसत ब्याजदर कात्तिकमा ४.९६ प्रतिशत रहेको थियो । अघिल्लो कात्तिकमा ०.७९ प्रतिशत रहेको थियो ।

वाणिज्य बैंकहरुको औसत आधार दर गत कात्तिकमा ७.८२ प्रतिशत कायम रहेको थियो । अघिल्लो कात्तिकमा ७.५७ प्रतिशत रहेको थियो ।

यस्तै कात्तिकमा वाणिज्य बैंकहरुको निक्षेपको भारित औसत ब्याजदर ५.८० प्रतिशत र कर्जाको भारित औसत ब्याजदर ९.०२ प्रतिशत रहेको राष्ट्र बैंकले जनाएको छ । अघिल्लो वर्षको सोही महिनामा यस्ता दरहरु क्रमशः ५.३१ प्रतिशत र ९.५२ प्रतिशत रहेका थिए ।

गत मंसिरमा वाणिज्य बैंकहरुले १२ खर्ब ३५ अर्ब ७२ करोड र अन्य वित्तीय संस्थाहरु (वाणिज्य बैंकहरुबीच बाहेक) को १ खर्ब ८४ अर्ब ८ करोडसहित १४ खर्ब १९ अर्ब ८० करोडको अन्तर–बैंक कारोबार गरेका छन् । अघिल्लो वर्षको सोही अवधिमा वाणिज्य बैंकहरुको १ खर्ब २८ अर्ब ५३ करोड र अन्य वित्तीय संस्थाहरुको ७८ अर्ब ५६ करोड गरी कुल २ खर्ब ७ अर्ब ९ करोड अन्तर बैंक कारोबार भएको थियो ।

मंसिरमा ९१-दिने ट्रेजरी बिलको भारित औसत ब्याजदर ५.०४ प्रतिशत रहेको छ । गत आवको सोही अवधिमा ९१–दिने ट्रेजरी बीलको भारित औसत ब्याजदर ०.६० प्रतिशत रहेको थियो । वाणिज्य बैंकहरुबीचको अन्तरबैंक कारोबारको भारित औसत ब्याजदर मंसिरमा ४.९६ प्रतिशत रहेको राष्ट्र बैंकको तथ्याङकमा उल्लेख छ । गत आवको सोही अवधिमा वाणिज्य बैंकहरुबीचको अन्तरबैंक कारोबारको भारित औसत ब्याजदर ०.१० प्रतिशत रहेको थियो ।

वाणिज्य बैंकहरुको औसत आधारदर मंसिरमा ८.२५ प्रतिशत रहेको थियो । गत आवको सोही अवधिमा ७.३६ प्रतिशत रहेको थियो ।

यस्तै मंसिरमा वाणिज्य बैंकहरुको निक्षेपको भारित औसत ब्याजदर ६.२४ प्रतिशत र कर्जाको भारित औसत ब्याजदर ९.२९ प्रतिशत रहेको छ । अघिल्लो वर्षको सोही महिनामा यस्ता दरहरु क्रमशः ५.१४ प्रतिशत र ९.३७ प्रतिशत रहेका थिए ।

यस्तै चालु आवको ६ महिनमा आइपुग्दा वाणिज्य बैंकहरुले १६ खर्ब २६ अर्ब ४ करोड रुपैयाँ र अन्य वित्तीय संस्थाहरु (वाणिज्य बैंकहरुबीच बाहेक) को २ खर्ब १३ अर्ब ५० करोडसहित १८ खर्ब ३९ अर्ब ५४ करोडको अन्तरबैंक कारोबार भएको तथ्याङकमा उल्लेख छ ।

अघिल्लो पुस मसान्तमा वाणिज्य बैंकहरुको १ खर्ब ८९ अर्ब १८ करोड र अन्य वित्तीय संस्थाहरु (वाणिज्य बैंकहरुबीच बाहेक) को १ खर्ब १ अर्ब ६० करोड रुपैयाँसहित २ खर्ब ९० अर्ब ७८ करोडको अन्तरबैंक कारोबार गरेका थिए ।

पुसमा ९१–दिने ट्रेजरी बीलको भारित औसत ब्याजदर ५.०७ प्रतिशत पुगेको छ । अघिल्लो पु्समा ०.८७ प्रतिशत मात्रै रहेको थियो ।

वाणिज्य बैंकहरुबीचको अन्तरबैंक कारोबारको भारित औसत ब्याजदर ४.७६ प्रतिशत पुगेको छ । अघिल्लो पुसमा भने ०.१४ प्रतिशत रहेको थियो ।

वाणिज्य बैंकहरुको औसत आधार दर पुसमा ८.४२ प्रतिशत रहेको थियो भने अघिल्लो पुसमा ७.१८ प्रतिशत रहेको थियो ।

यस्तै पुसमा वाणिज्य बैंकहरुको निक्षेपको भारित औसत ब्याजदर ६.३७ प्रतिशत र कर्जाको भारित औसत ब्याजदर ९.४४ प्रतिशत रहेको राष्ट्र बैंकको तथ्याङकमा उल्लेख छ । अघिल्लो पुसमा यस्ता दरहरु क्रमशः ५.० प्रतिशत र ९.०९ प्रतिशत रहेको राष्ट्र बैंकले जनाएको छ ।