कैलाश सिरोहियालाई हेलिकप्टरबाट काठमाडौं ल्याइयो

काठमाडौं । नागरिकता प्रकरणमा पक्राउ परेका कान्तिपुर मिडिया ग्रुपका अध्यक्ष कैलाश सिरोहियालाई थप उपचारका लागि सिम्रिक एयरको हेलिकप्टरमा काठमाडौंको मेडिसिटी अस्पताल ल्याइएको छ ।

धनुषाको काभ्या अस्पतालले थप उपचारका लागि मेडिसिटीमा रिफर गरेपछि सिरोहियालाई काठमाडौं ल्याइएको हो ।

सिरोहियामाथि अनुसन्धानका लागि सोमबार मात्रै धनुषा जिल्ला अदालतले प्रहरीलाई तेस्रो पटक तीन दिनको म्याद थपको अनुमति दिएको थियो । तर काभ्या अस्पतालले उनको स्वास्थ्यमा गम्भीरता देखिएको भन्दै थप उपचारका लागि मेडिसिटीमा रिफर गरेको हो ।

मंगलबार दिउँसो उनलाई मेडिसिटी ल्याइएको छ । नागरिकता कीर्तेको उजुरीमा अदालतले पक्राउ पुर्जी दिएपछि प्रहरीले जेठ ८ गते सिरोहियालाई थापाथलीस्थित कान्तिपुरको कार्यकक्षबाट पक्राउ गरी धनुषा लगेको थियो ।