बरिष्ठ ज्येष्ठ नागरिक भत्ता बाढ्न महानगरका जनप्रतिनिधि घर दैलोमा

काठमाडौं । लकडाउन जारी रहेकै बेला काठमाडौँ महानगरपालिका वडा–१८ का अध्यक्ष न्हुच्छेकाजी महर्जन इखापोखरीकी ८९ वर्षीया विष्णुप्रिया मालीको निवासमा बरिष्ठ ज्येष्ठ नागरिक भत्ता बोकेर पुग्दा मालीको अनुहारमा खुशीको चमक देखिन्थ्यो ।

वडाध्यक्ष महर्जनले मालीको हातमा बरिष्ठ ज्येष्ठ नागरिक भत्ता १२ हजार रुपैयाँ थमाएपछि विष्णुप्रियाले नेवारी लवजमै औधी खुशी लागेको प्रतिक्रिया दिइन् ।

लामो समयदेखि थाइराइड र प्रेसरको औषधी नियमित सेवन गरिरहेकी जोशी गल्लीकी ८७ वर्षीय राजाराम जोशीले काठमाडौँ महानगरपालिकाले घरमै आएर उपलब्ध गराएको बरिष्ठ ज्येष्ठ नागरिक भत्ताबाट थाइराइड र प्रेसरको औषधी किन्ने बताइन् ।

‘तीन वर्षदेखि नियमित रुपमा यो भत्ता लिदैँ आएको छु । पहिला वडामा गएर लिन्थे, उनले भने, ‘आज जनप्रतिनिधि नै निवासमा भत्ता बोकेर आउँदा खुशी लाग्यो । मुलुक बन्दाबन्दीमा छ । मेरो औषधी सकिन लागेको थियो । अब आज–भोलि नै औषधी किन्छु । बाँकी केही रकम घरखर्च गर्नुपर्ला केही बचत राख्छु ।’

वडा-१८ कै भुरुङखेलकी ८८ वर्षीया सुधादेवी प्रधानले पनि यसरी जनप्रतिनिधिलाई भत्तासहित आफ्नै निवासमा देख्दा स्थानीय सरकार घर–दैलोमै आएको अनुभव सुनाइन । ‘मुलुक अहिले लकडाउनको अवस्थामा छ । यस्तो बेलामा हामी वडासम्म जाने अवस्था थिएन । जनप्रतिनिधि बरिष्ठ ज्येष्ठ नागरिक भत्ता बोकेर आफ्नै निवासमा आउँदा औधी खुशी लागेको छ,’ उनले केही मुस्कारसहित भनिन्, ‘यसलाई मैले ज्येष्ठ नागरिकको साथमा काठमाडौँ महानगरपालिका छ भन्ने मात्रै ठानेको छैन ज्येष्ठ नागरिकहरुप्रतिको सम्मानका रुपमा समेत लिएकी छु ।’

काठमाडौँ महानगरपालिकाले माली, जोशी र प्रधानलाई मात्रै होइन ३२ वटै वडामा स्थायी वासोवास गर्ने ७५ वर्ष पुगेका महिला र ८० वर्ष पुगेका पुरुष बरिष्ठ ज्येष्ठ नागरिकलाई घर–घरमै पुगेर महानगर बिशेष भत्ता उपलब्ध गराउँदै आएको छ । ३२ वटै वडामा स्थायी वासोवास गर्ने यस्ता बरिष्ठ ज्येष्ठ नागरिक ९ हजार १ सय १७ जना छन् ।

त्यसैगरी महानगरपालिकाले पूर्ण अपाङ्गता भएका ४ सय ४५ जनालाई पनि यहि बेला बिशेष भत्ता घर–घरमै पुर्याउँदै छ । त्यसका लागि महानगरपालिकाले ३२ वटै वडालाई रकम निकासा गरिसकेको छ । केही वडाले वितरण सुरु गरेका छन् भने केहीले तत्कालै सुरु गर्ने जानकारी दिएका छन् ।

‘काठमाडौँ महानगरपालिकाले जेष्ठ नागरिकले समाजलाई पु¥याएको योगदानको सम्मान स्वरुप वार्षिक रुपमा वरिष्ठ जेष्ठ नागरिकलाई बिशेष भत्ता वितरण गर्दै आएको छ’, काठमाडौँ महानगरपालिकाका प्रमुख बिद्यासुन्दर शाक्यले भने, ‘अहिले मुलुक नै बन्दाबन्दीको अवस्थामा छ । यस्तो बेलामा बरिष्ठ ज्येष्ठ नागरिकलाई महानगरपालिकाले वितरण गरेको बिशेष भत्ताले केही राहत महशुस होस भनी घर–घरमै लगेर वितरणको व्यवस्था गरेका हौँ ।’

दुःखका बेलामा पनि महानगरपालिका हाम्रो साथमा छ भन्ने महशुस उनीहरुलाई होस भन्ने मनसायले यही बेला भत्ता उपलब्ध गराएको उनको भनाइ छ । उनले विगतमा महानगरपालिकाले विशेषज्ञ चिकित्सकको टोलीसहित ज्येष्ठ नागरिकको घर-घरमै गई निशुल्क स्वास्थ्य परीक्षण सेवा उपलब्ध गराउने लगायतका काम गरेको जानकारी दिए ।

‘३२ वटै वडामा ९ हजार १ सय १७ बरिष्ठ ज्येष्ठ नागरिक रहेको हामीलाई तथ्याङ्क प्राप्त भएको छ’, उनले भने, ‘ती सबै बरिष्ठ ज्येष्ठ नागरिकलाई घर–घरमै पुगेर जनप्रतिनिधिले भत्ता उपलब्ध गराउनु हुनेछ ।’ उनले पूर्ण अपाङ्गता भएका नागरिकलाई पनि घर–घरमै पुगेर भत्ता उपलब्ध गराउने जानकारी दिए । पूर्ण अपाङ्गता भएका नागरिकलाई महानगरपालिकाले वार्षिक तीन हजार रुपैयाँ दिदैँ आएको छ ।

शाक्यले नेपाल सरकारले ज्येष्ठ नागरिकलाई उपलब्ध गराउने सामाजिक सुरक्षा भत्ता बाहेक काठमाडौँ महानगरपालिकाले छुट्टै वार्षिक १२ हजार रुपैयाँ बिशेष भत्ता उपलब्ध गराउँदै पनि जानकारी दिए ।

‘महानगरभित्र स्थायी बसोबास गर्ने ७५ वर्ष पुगेका महिला र ८० वर्ष पुगेका पुरुष र पूर्ण अपाङ्गता भएकालाई हामीले बार्षिक रुपमा बिशेष भत्ता उपलब्ध गराउँदै आएका छौँ,’ शाक्यले भने, ‘कोही पनि वरिष्ठ जेष्ठ नागरिकले मेरो कोही पनि छैन भन्ने महसुस गर्नु नपरोस भनेर हामीले यो भत्ता दिदैँ आएका छौँ । जेष्ठ नागरिकले समाजलाई पु¥याएको योगदानको सम्मान स्वरुप पनि यो भत्ता वितरण गरिएको हो ।’

उनले जेष्ठ नागरिकहरुका लागि मनोरञ्जन तथा सेवा केन्द्र स्थापना गर्ने, वृद्ध-वृद्धा मनोरञ्जन पार्क निर्माण गर्ने जस्ता कार्यमा पनि महानगरपालिका लागिरहेको जानकारी दिए ।

काठमाडौँ महानगरपालिकाका प्रवक्ता समेत रहेका वडा-१५ का अध्यक्ष ईश्वरमान डंगोलले जेठ २० भित्रमा सबै वडामा वितरण गरिसक्ने गरी रकम निकासा गरेको जानकारी दिए । ‘यो बन्दाबन्दीको अवस्थामा उहाँहरुलाई घर–घरमै लगेर दिने गरी हामीले व्यवस्था गरेका छौँ,’ उनले भने, ‘यो भत्ताले एकतिर यो कठिन अवस्थाका बेला केही खर्च टर्ने छ भने अर्कोतर्फक मतदातासँग एक पटक पुनः साक्षत्कार गर्ने र उहाँहरुको समस्या बुझ्ने अवसर प्राप्त हुनेछ ।’

काठमाडौँ महानगरपालिकाका प्रशासन विभाग प्रमुख नमराज ढकालले ९ हजार १ सय १७ बरिष्ठ ज्येष्ठ नागरिक र पूर्ण अपाङ्गता भएका ४ सय ४५ जनालाई महानगर बिशेष भत्ता उपलब्ध ३२ वटै वडालाई ११ करोड ६ लाख १७ हजार रुपैयाँ निकासा गरेको जानकारी दिए ।

वडा नम्बर-२६ का अध्यक्ष ख्याम तिवारीले लकडाउनका कारण समस्यामा परेका बरिष्ठ ज्येष्ठ नागरिकलाई यो बिशेष भत्ताले केही राहतको अनुभूति हुने अपेक्षा गरेको बताए । ‘हामी यो लकडाउनको अवधीमा वडावासीलाई राहत उपलब्ध गराउने लगायतका काममा निरन्तर खटिरहेका छौँ,’ उनले भने, ‘महानगरभित्र स्थायी बसोबास गर्ने बरिष्ठ ज्येष्ठ नागरिकलाई दिइने यो भत्ताले उहाँहरुलाई दुःखका बेलामा पनि महानगरपालिका हाम्रो साथमा छ भन्ने महशुस होला भन्ने अपेक्षा गरेका छौँ ।’

उनले काठमाडौँमै घर भए पनि कतिपय बेरोजगार रहेको, दुई छाक खानका लागि पनि धौ–धौ हुने अवस्था रहेको भन्दै यस्तो बेलामा यो भत्ताले राहत हुने बताए । उनले आफ्नो वडामा २ सय ५३ जना वरिष्ठ ज्येष्ठ नागरिक रहेको भन्दै बुधबारबाट उनीहरुको घर–घरमै पुगेर भत्ता वितरण गर्ने जानकारी दिए ।

वडा नम्बर-९ की सदस्य सिर्जना भेटवालले पनि यस्तो बेलामा उपलब्ध गराउने बिशेष भत्ताले उनीहरुलाई राहतको महशुस हुने भन्दै घर–घरमै लगेर वितरण गर्ने जानकारी दिए । अघिल्लो वर्ष ५ हजार ६ सय २१ महिला र १ हजार ९ सय ३६ पुरुष गरी ७ हजार ९ सय ५७ जनालाई महानगरपालिकाले बिषेश भत्ता उपलब्ध गराएको थियो ।