कुलेश्वरको खाद्य स्टोरमा जब आपूर्ति मन्त्री भट्ट पुगे

काठमाडौँ । लकडाउनको समयमा नागरिकलाई दैनिक उपभोग्य वस्तुको आपूर्तिमा कुनै समस्या नहोस् भनेर उद्योग वाणिज्य तथा आपूर्ति मन्त्रालय २४ सै घण्टा परिचालित भएको छ ।

मन्त्रालयको नेतृत्वमा रहेका मन्त्री लेखराज भट्ट र उनको सम्पूर्ण टिम नै लकडाउनको पर्वाह नगरी नागरिकलाई सहज रुपमा दैनिक उपभोग्य वस्तुमा कुनै कमी नहोस् भनेर खटिरहेको छ ।

कहिले खाना पकाउने एलपीजी ग्यासको अवस्थाको बारेका स्थलगत जानकारी लिन खटेको टिम कहिले दाल, चामल तथा मैदाको अवस्था कस्तो छ र के कति मात्रामा उपलब्ध छ भनेर निरन्तर अनुमगनमा लागेको छ । कुनै पनि समस्या नहोस् भन्ने तर्फ विशेष ध्यान दिइएको मन्त्री भट्टले जानकारी दिए ।

सरकार सबै नागरिकको अभिभावक हो र समस्यामा परेका नागरिकलाई के कसरी राहत उपलब्ध गराउन सकिन्छ र कसरी सहज रुपमा दैनिक उपभोग्य वस्तु उपलब्ध गराउन सकिन्छ भनेर लागिपरेको मन्त्री भट्टले भने ।

‘हामी निरन्तर रुपमा नै खाद्य पदार्थको अवस्था र आपूर्ति अवस्थाको बारेमा नियमित जानकारी लिइरहेका छौ । कुनै पनि समस्या नआहोस् भनेर विशेष ध्यान दिइएको छ,’ उनले भने ।

मन्त्रालयको विशेष पहलमा नै नेपाल आयल निगमले माग भन्दा बढी एलपीजी ग्यास आयात गरिरहेको छ । सोही कारण निगमले १४.२ किलोको सिलिण्डरमा ७.१ किलो ग्यास भरेर पठाएको थियो ।

तर ग्यासको पुग्दो आपूर्ति भएका कारण निगमले गरेको सो व्यवस्थालाई पुनः परिवर्तन गरेर १४.२ किलोमा नै पु¥याउनुपर्ने आवश्यकता देखिएको छ । निगमले टेकुमा रहेको साविक नेशनल टे«डिङ रहेको भवनमा विभिन्न १८ प्रकारका ग्यास उपलब्ध गराएको छ । ग्यास आवश्यक पर्नेले सो स्थानमा गएर बिहानदेखि साँझसम्म नै गयास लिन सक्ने व्यवस्था गरिएको छ ।

यस्तै राजधानी काठमाडौँमा लोकप्रिय रहेको नेपाल ग्यास र बाबा ग्यासले घुम्ती पसल नै सञ्चालन गरेर ग्यास आपूर्ति गरिरहेको छ ।

सरकारको पछिल्लो व्यवस्थापनलाई लिएर ग्यास उद्योगी तथा बिक्रेता समेत सरकारलाई पूर्णरुपमा साथ दिएका छन् ।

दैनिक उपभोग्य वस्तुको अभाव नहोस् र भएका गोदाममा के कस्तो अवस्था रहेको छ भनेर आजै उद्योग वाणिज्य तथा आपूर्ति मन्त्री भट्ट, वाणिज्य सचिव डा बैकुण्ठ अर्याललगायतको टोलीले कालीमाटी, कलेश्वर क्षेत्रका खाद्य स्टोरमा अनुगमन गरेको छ ।

स्टोरमा आगामी एक महिनालाई पुग्ने खाद्यान्न मौज्दात रहेको पाइएको छ । मन्त्री भट्टले खाद्य पदार्थको आपूर्ति र व्यवस्थापनमा सहजीकरण गर्न सम्वद्ध स्टोरलाई आग्रह गर्नुभयो । उनले कुनै समस्या आए मन्त्रालयलाई भन्न वा सोझै आफूसँग सम्पर्क गर्न समेत आग्रह गरे ।

स्टोरका सञ्चालक एवम् नेपाल चेम्बर अफ कमर्सका आपुर्ति सभापति देवेन्द्रभक्त श्रेष्ठले आफूहरुसँग झण्डै एक महिनालाई पुगने चामल, दाल तथा मैदा रहेको भन्दे विपदको समयमा आफूहरुलाई आपूर्ति गर्न कुनै समस्या नभएको मन्त्री भट्टलाई जानकारी दिए ।

उनले लकडाउनको समयमा श्रमिक नपाइएको तथा आयातमा भने केही बढी मूल्य तिर्नुपरेको समेत बताए । उनले खाद्य पदार्थको आपूर्तिका लागि चालक तथा श्रमिकलाई सहज रुपमा आउने वातावरण बनाइदिन समेत आग्रह गरेका थिए ।

श्रेष्ठको मागलाई आफुहरुले सहजीकरण गरिदिने मन्त्री भट्टको प्रतिवद्धता थियो । नेपालमा नै धान कुटने मिल रहेको र धान समेत प्रर्याप्त रहेकाले कुटानी पिसानीमा केही सहज गरिदिन समेत आग्रह गरिएको थियो ।

उनले ढुवानी महंगो भएको र श्रमिक समेत कम भएकाले लोड अनलोडमा समस्या देखिएको भन्दै सुधार गरिदिन आग्रह गरेका थिए ।

मन्त्री भट्टले नियमित रुपमा मन्त्रालयको टोली र आफू समेत समग्र अवस्थाको मूल्याकनमा निरन्तर खटेको भन्दै सहयोगका लागि व्यापारीलाई आग्रह समेत गरेका थिए । मन्त्री भट्टलगायतको टोलीले कुलेश्वरका विभिन्न खाद्य पसल तथा स्टोरको अनुगमन गरेका थिए ।