बुढीगण्डकीमा वार्षिक १० अर्ब लगानी गर्न सञ्चय कोष तयार
काठमाडौँ । कर्मचारी सञ्चय कोषले बहुचर्चित बुढीगण्डकी जलविद्युत आयोजानमा वार्षिक १० अर्ब रुपैयाँ लगानी गर्न तयार रहेको बताएको छ । सरकारले आयोजनालाई स्वदेशी लगानीमा नै निर्माण गर्ने निर्णय गरेपछि सञ्चय कोषले वार्षिक १० अर्ब रुपैयाँ लगानी गर्न तयार रहेको जनाएको हो ।
केही हप्ताअघि प्रधानमन्त्री शेरबहादुर देउवाको मन्त्रिपरिषदको बैठकले १२ सय मेगावाट विद्युत उत्पादन क्षमताको बुढीगण्डकी स्वदेशी लगानीमै बनाउने निर्णय गरेको थियो ।
सञ्चय कोष लगानी गर्न तयार रहेपछि अब बुढीगण्डकी स्वदेशी लगानीमै बनाउनका लागि स्रोतको समस्या नपर्ने देखिएको छ ।
प्रचण्ड नेतृत्वको सरकारले चिनियाँ कम्पनी चाइना गेजुवालाई बिना प्रतिस्पर्धा बुढीगण्डकी बनाउन दिने सम्झौता गरेको थियो । देउवा सरकारले चाइना गेजुवासँग भएको उक्त सम्झौता खारेज गर्दै राष्ट्रिय गौरवको बुढीगण्डकी आयोजनाको नेपालीकै लगानीमा बनाउने निर्णय गरेको थियो ।
‘बूढीगण्डकी जस्ता ठूला आयोजना स्वदेशी लगानीमा नै निर्माण गर्न सरकारले आग्रह गरेपछि हामीले वार्षिक १० अर्ब रुपैयाँसम्म लगानी गर्न सक्छौं भनेर भनेका छौं,’ कोषका एक अधिकारीले क्लिमाण्डूसँग भने ।
कोषले नै वार्षिक १० अर्ब लगानी गर्दा १० वर्षमा १ खर्ब रुपैयाँ रकम आयोजनाका लागि जुट्ने हुनसक्ने देखिएको छ । आयोजनाको निर्माण अवधि कम्तीमा १० वर्ष हुने भएकाले पेट्रोलियम कर र कोषको लगानी जोड्दा करिब २ खर्ब रकम जुट्ने भएको हो ।
यसरी रकम जोहो गर्दा आयोजनाका लागि मात्रै ६३ अर्ब रकम पुग्दैन । आयोजनाको विस्तृत परियोजना प्रतिवेदनअनुसार कुल लागत २६३ अर्ब हुनेछ । सरकारले विभिन्न वित्तीय संस्था वा निकायबाट मात्रै ६३ अर्ब रकम खोजे हुने अवस्था रहन्छ ।
स्वदेशी लगानीमा निर्माण गर्ने भन्दै तत्कालीन प्रधानमन्त्री केपी ओलीको सरकारले पेट्रोलियम पदार्थमा लगाएको करबाट पनि बुढीगण्डकीका लागि हालसम्म १३ अर्ब रुपैयाँ उठिसकेको छ ।
सञ्चय कोष लगानी गर्न तयार रहेपछि अब बुढीगण्डकी स्वदेशी लगानीमै बनाउनका लागि स्रोतको समस्या नपर्ने देखिएको छ ।
पुष्प दुलाल
