औपचारिकरुपमा सार्वजनिक नभइ कोरोना कहरमै बिक्यो ६ वटा २ करोड पर्ने बीएमडब्लु कार

काठमाडौं । विश्वविख्यात लक्सरी गाडी बीएमडब्लु औपचारिकरुपमा नेपाल भित्रिएको छ । लामो समयको प्रयासपछि बीएमलब्लु गत साउनमा नेपाल भित्रिएको हो ।

व्यापारिक घराना लक्ष्मी ग्रुपले जमर्नी कार निर्माता बीएमडब्लुलाई नेपाल भित्र्याएको हो । लक्ष्मी प्रिमियम मोटर प्रालि बीएमडब्लुको नेपालका लागि आधिकारिक बिक्रेता हो । काठमाडौंको तीनकुनेमा यसको शोरुम छ ।

सन् २०१४ मै लक्ष्मी ग्रुपले बीएमडब्लु भित्र्याउने सम्झौता गरेको थियो । तर आवश्यक तयारी गर्दागर्दै भुकम्प गएपपछि प्रक्रिया स्थगन भएको थियो ।

‘हामीले सन् २०१४ को अन्त्यतिर बीएमडब्लुको आधिकारिक बिक्रेता डिलरसिप लिने सम्झौता गरेका थियौं । पछि भूकम्प गयो र २०१६ मा सार्वजनिक गर्ने योजना बनाएका थियौं । त्यो पनि विविध कारणले सफल भएन र गत साउनमा गाडी भित्र्याएका छौं,’ लक्ष्मी ग्रुपका सञ्चालक निराकर श्रेष्ठले क्लिकमाण्डूसँग भने ।

साउनयता अहिलेसम्म ६ वटा गाडी बिक्री गरिसकिएको श्रेष्ठले जानकारी दिए । लक्ष्मी प्रिमियम मोटर प्रालिले न्यूनतम् १ करोड ९० लाख रुपैयाँदेखि ४ करोड रुपैयाँसम्म पर्ने डेढ दर्जन बीएमडब्लु कार भित्र्याएको थियो ।

‘अहिलेसम्म २ करोड रुपैयाँ पर्ने ६ वटा गाडी बिक्री गरिसकेका छौं,’ उनले भने, ‘कोरोना कहरमा पनि प्रिमियम ब्राण्डका गाडी यो परिमाणमा बिक्री हुनुलाई सन्तोषजनक नै मान्नुपर्छ ।’

पहिले नै बीएमलब्लु किन्न भनेर तयारी अवस्थामा बसेकाहरुले किनेको र नयाँ इन्क्वायरी भने खासै नआएको उनको भनाइ थियो ।

सामान्य अवस्था भएको भए एक वर्षमा १०० वटासम्म गाडी बिक्री गर्ने कम्पनीको लक्ष्य थियो । तर, यो वर्ष भने उक्त लक्ष्य भेट्टाउन सक्ने अवस्था छैन ।

नेपालमा यसअघि पनि बीएमलब्लु गाडी आएको थियो । तर आधिकारिक डिलरसिपसहित भने पहिलोपटक बीएमलब्लु भित्रिएको हो । बीएमडब्लु नेपाल आएसँगै यसको प्रतिस्पर्धा मर्सिडिजसँग हुने छ । विश्वव्यापीरुपमा प्रिमियम ब्राण्डका नेपालमा उपलब्ध गाडी मर्सिडिज र बीएमडब्लु हुन् ।

‘लक्जरी र ब्राण्डेड गाडीका पारखीहरुलाई लक्षित गरेर हामीले बीएमडब्लुलाई नेपाल भित्र्याएका हौं,’ श्रेष्ठले भने, ‘चाँडै नै औपचारिकरुपमा सार्वजनिक गर्छौं ।’

बावेरियन मोटर वर्क्स (बीएमडब्लू) जर्मनको अटोमोबाइल्स कम्पनी हो । सन् १९१६ मा स्थापना भएको कम्पनीले कार बाहेक मोटरसाइकल समेत उत्पादन गर्छ । यसका संस्थापक कार्ल र्याप हुन् ।

सन् १९४५ सम्म बीएमडब्लुले विमानको इन्जिन समेत बनाएको थियो । तर, पहिलो विश्व युद्ध पछि वर्सैलिस युद्धविराम सन्धी अनतर्गत बीएमडब्लूले एयरक्राफ्टको इन्जिन उत्पादन बन्द गरेको थियो ।

बीएमडब्लुले सन् १९२३ मा मोटरसाइकल र सन् १९२८ मा कारको उत्पादन सुरु गरेको थियो । लग्जरी गाडी भएपनि बीएमडब्लूको स्वामित्व भने सार्वजनिक निकायसँग बढी रहेको छ ।

व्यक्तिगत रुपमा बीएमडब्लूका ठूला सेयरधनी स्टीफन क्वान्ड र सुसैन क्वैलटसँग बढी छ । जसमा स्टीफनसँग २९ प्रतिशत र सुसैनसँग २१ प्रतिशत सेयर स्वामित्व रहेको छ ।

सन् २०१९ मा जर्मनको बीएमडब्लूले २५ लाख गाडी विश्वभरमा बिक्री गरेको थियो । सन् २०१९ मा १०४ बिलियन युरोको बिक्री बीएमडब्लूले गरेको थियो । यसको बजार पूँजीकरण करिब ४३ अर्ब अमेरिकी डलर रहेको छ ।

सरकारले लक्जरी गाडीको आयातमा निरुत्साहित गरेका कारण बीएमडब्लु अझ धेरै महंगो बन्न पुगेको छ । सरकारले १००० सीसीसम्मका गाडीमा २५१ प्रतिशत, १००० देखि १५०० सीसीसम्मका गाडीमा २६३ प्रतिशत, १५०० देखि २००० सीसीका गाडीमा २६६ प्रतिशत, २००० देखि २५०० सीसीसम्मका गाडीमा ३०३ प्रतिशत र २५०० देखि ३००० सीसीका गाडीमा ३२६ प्रतिशत राजस्व असूली गर्दै आएको छ ।

लक्ष्मी प्रिमियम मोटर प्रालिले भित्र्याएका बीएमडब्लु गाडी २००० देखि ३००० सीसीसम्मका रहेका छन् । जसकारण ४ करोडको गाडी किन्नेले ३ करोड रुपैयाँको हाराहारीमा सरकारलाई कर तिर्नुपर्छ ।