सेयरधनीलाई ११ बैंकले दिए लाभांश, न्यूनतम ४ देखि अधिकतम २५.५ प्रतिशतसम्म, कुनको कति?

काठमाडौं । वाणिज्य बैंकहरुले गत आर्थिक वर्षको नाफाबाट सेयरधनीलाई लाभांश घोषणा गर्नेक्रम जारी छ ।

बैंकहरुले गत आर्थिक वर्ष २०८०/०८१ को मुनाफाबाट आफ्नोश शेयरधनीहरुलाई लाभांश घोषणा गरेका हुन् । अहिलेसम्म ११ वटा बैंकले लाभांश दिने घोषणा गरिसकेका छन् ।

लाभांश घोषणा गरेका बैंकले बोनस भन्दा पनि नगदलाई बढी प्राथमिकता दिएका छन् ।

यसवर्ष बैंकहरुको लाभांश दर भने घटेको छ । अघिल्लो आवको तुलनामा गत आवमा बैंकहरुले लाभांश दर घटाएका छन् । बैंकको पुँजी वृद्धिअनुसार व्यवसाय बढाउन नसक्दा लाभांश दर घटाएको बैंकका अधिकारी बताउँछन् ।

हाल नेपाल स्टक एक्सचेन्जमा सूचिकृत १९ वाणिज्य बैंकमध्ये हालसम्म ११ वटा वाणिज्य बैंकहरुले लाभांश प्रस्ताव गरेका छन् । केही बैंकले लाभांश नदिने घोषणा गरिसकेका छन् । लाभांश दिएका बैंकहरुले न्यूनतम ४ देखि अधिकतम २५.५ प्रतिशतसम्म लाभांश दिएका छन् ।

स्टयाण्डर्ड चार्टर्ड बैंक

गत वर्षका नाफाबाट लाभांश घोषणा गरेका बैंकमध्ये सबैभन्दा बढी स्टयाण्डर्ड चार्टर्ड बैंकको रहेको छ । बैंकले आर्थिक वर्षको नाफाबाट सेयरधनीलाई २५.५ प्रतिशत लाभांश दिएको छ । जसमा बोनस ६.५ प्रतिशत बोनस र कर सहित १९ प्रतिशत नगद लाभांश दिएको छ ।

एभरेष्ट बैंक

एभरेष्ट बैंकले गत आर्थिक वर्षको नाफाबाट १५.५३ प्रतिशत लाभांश दिएको छ । जसमा १० प्रतिशत बोनस सेयर र ५.५३ प्रतिशत नगद लाभांश दिएको छ ।

नबिल बैंक

गत आर्थिक वर्षको नाफाबाट नबिल बैंकले सेयर धनीलाई १० प्रतिशत नगद लाभांश दिएको छ । यो पटक बैंकले बोनस सेयर दिएको छैन ।

ग्लोबल आइएमई बैंक

ग्लोबल आइएमई बैंकले सेयरधनीलाई गत आर्थिक वर्षको नाफाबाट ५.५ प्रतिशत लाभांश दिएको छ । बैंकले यो पटक सेयरधनीलाई नगद लाभांश नदिएर बोनस सेयर मात्रै दिएको छ ।

सानिमा बैंक

सानिमा बैंकले सेयरधनीलाई गत आर्थिक वर्षको नाफाबाट ५.२६ प्रतिशत नगद लाभांश दिएको छ । यो पटक बैंकले बैंकले सेयरधनीलाई बोनस सेयर नदिएको हो ।

सिटिजन बैंक

सिटिजन बैंकले सेयरधनीलाई गत आर्थिक वर्षको नाफाबाट ४.२१ प्रतिशत लाभांश दिएको छ । जसमा ४ प्रतिशत बोनस र करसहित ०.२१ प्रतिशत नगद लाभांश दिएको छ ।

प्राइम कमर्सियल बैंक

प्राइम कमर्सियल बैंकले गत अघिल्लो आर्थिक वर्षको नाफाबाट सेयरधनीलाई ५ प्रतिशत लाभांश दिएको छ । बैंकले गत आवको नाफाबाट नगद मात्रै लाभांश दिएको छ । यो पटक बैैंकले भने बोनस सेयर दिएको छैन ।

सिद्धार्थ बैंक

सिद्धार्थ बैंकले गत आर्थिक वर्षको नाफाबाट सेयरधनीलाई ४ प्रतिशत लाभांश दिएको छ । यो पटक बैंकले सेयरधनीलाई बोनस सेयर दिएको छैन । नगद लाभांश मात्रै दिएको हो ।

लक्ष्मी सनराइज बैंक

लक्ष्मी सनराइज बैंकले सेयरधनीलाई गत आर्थिक वर्षको नाफाबाट ५.२६ प्रतिशत लाभांश दिएको छ । जसमा बोनस ५ प्रतिशत र कर प्रयोजनका लागि ०.२६ प्रतिशत नगद लाभांश रहेको छ ।

नेपाल एसबीआई बैंक

नेपाल एसबीआई बैंकले गत आर्थिक वर्षको नाफाबाट १०.६५ लाभांश दिएको छ । बैंकले दिएको लाभांशमा बोनस भन्दा नगद लाभांश रहेको छ । बैंकले ३.८ प्रतिशत बोनस सेयर र ६.८५ प्रतिशत नगद लाभांश दिएको छ ।

कृषि विकास बैंक

कृषि विकास बैंकले गत आर्थिक वर्षको नाफाबाट सेयरधनीलाई १०.५३ प्रतिशत लाभांश घोषणा गरेको छ । जसमा बोनस ७.५३ प्रतिशत र कर सहित ३ प्रतिशत नगद लाभांश रहेको छ ।