बल्खुमा झडप र ढुंगामुढा

काठमाडौं । दुर्गा प्रसाईं नेतृत्वको अभियानले आयोजना गरेको प्रदर्शनका क्रममा बल्खुमा झडप भएको छ ।

बिहीबार बिहान काठमाडौं उपत्यकाका विभिन्न स्थानबाट प्रसाईं नेतृत्वको अभियानले आयोजना गरेको प्रदर्शनमा सहभागी हुन आएकाहरु बल्खुमा भेला हुने क्रममा झडप भएको हो ।

सोही मार्गहुँदै मोटरसाइकल र्‍यालीसहित तीनकुने जाने क्रममा रहेका युवा संघका कार्यकर्तामाथि प्रसाईं पक्षधरले ढुंगामुढा गरेपछि तनाव भएको थियो । त्यसपछि प्रहरीले बल प्रयोग गरेर स्थितिलाई नियन्त्रणमा लिएको थियो ।

कालिमाटीबाट बल्खु हुँदै तीनकुने आउन लागेको युवा संघको बाइक र्‍यालीमाथि बल्खुमा प्रसाईं पक्षको कार्यक्रममा सहभागी हुन आएकाहरुले ढुंगा प्रहार गरेका थिए । ढुंगामुढाबाट केही संरचनामा क्षति पुगेको छ भने केही मोटरसाइकल र गाडीमा पनि क्षति पुगेको छ ।

केही बेरको तनावपछि अवस्था सामान्य बनेको छ । बल्खु क्षेत्रमा सवारी साधनलाई डाइभर्ट गरिएको छ । प्रसाईं नेतृत्वको कार्यक्रमको सुरक्षाका लागि बाक्लो प्रहरी तैनाथी गरिएको छ ।