सवारी साधनमा हेडलाइट र हर्न थप गर्नेमाथि कारबाही हुने, विभागले निकाल्यो सूचना

काठमाडौं । सरकारले सवारी साधनमा उत्पादक कम्पनीले तोकेको प्राविधिक स्पेसिफिकेसनभन्दा बाहिरका हेडलाइट र हर्न जडान गरी चलाउनेहरूमाथि कडा निगरानी र कारबाही गर्ने भएको छ ।

यातायात व्यवस्था विभागले सूचना जारी गर्दै यस्तो चेतावनी दिएको हो । विभागका अनुसार पछिल्लो समय सवारी साधनको हेडलाइट भएको स्थानको नजिक वा अन्य भागमा कम्पनीले तोकेको भन्दा फरक र अधिक क्षमताका लाइटहरू जडान गर्ने क्रम बढेको छ । यस्ता अनधिकृत लाइटहरूले गर्दा सवारी चलाउन बाधा पुग्ने र पैदल यात्री एवं अन्य सवारी साधनहरू दुर्घटनामा पर्ने जोखिम बढेपछि विभागले कडाइ गर्न लागेको हो ।

के छ कानुनी प्रावधान ?

सवारी तथा यातायात व्यवस्था ऐन, २०४९ को धारा ३९ अनुसार कार्यालयको पूर्व स्वीकृति नलिई सवारीको स्वरूप वा प्राविधिक पक्षमा हेरफेर गर्न पाइँदैन । यसैगरी, सवारी निरीक्षण/परीक्षण मापदण्ड २०७४ ले हेडलाइटको तीव्रताका सम्बन्धमा स्पष्ट सीमा तोकेको छ । डिप वा कम बिममा प्रकाशको तीव्रता १५,००० देखि ३०,००० क्यान्डेला सम्म हुनुपर्ने छ भने हाई बिममा प्रत्येक हेड ल्याम्प १,०००,००० क्यान्डेला भन्दा कम र चारवटै हेड ल्याम्पको समग्र तीव्रता २,००,००० क्यान्डेला भन्दा कम हुनुपर्ने व्यवस्था छ।

प्रकाशको तीव्रता मात्र नभई हर्नको ध्वनिका सम्बन्धमा पनि विभागले स्पष्ट मापदण्ड तोकेको छ । सवारी साधनमा जडान गरिने हर्नको ध्वनि न्यूनतम ९० डेसिबलदेखि अधिकतम ११२ डेसिबल सम्म मात्र हुनुपर्नेछ । विभागले आफुखुशी ‘प्रेसर हर्न’ वा अन्य चर्को आवाज आउने हर्नहरू जडान गर्न पूर्ण रूपमा रोक लगाएको जनाएको छ ।

यातायात व्यवस्था विभागले जारी गरेको सूचनामा भनिएको छ, ‘यदि उक्त प्रावधान विपरीत बत्ती तथा हर्न जडान गरी सवारी साधन चलाएको खण्डमा प्रचलित नियम कानून अनुसार कडा कारबाही गरिनेछ ।’