आरजूलाई पक्राउ गर्न बूढानीलकण्ठ गएको होइन : सीआईबी

काठमाडौं । प्रहरीको केन्द्रीय अनुसन्धान ब्युरो (सीआईबी)ले नेपाली कांग्रेसकी नेतृ आरजू देउवालालाई पक्राउ गर्न प्रहरी टोली खटाइएको भनेर केही मिडियामा आएको समाचारका विषयमा गम्भीर ध्यानाकर्षण भएको जनाएको छ ।

सिआइबीले विज्ञप्ति जारीगरी विभिन्न व्यक्तिहरुको नामसमेत तोकी पक्राउ गर्न प्रहरी खटिगएको भनी आएका समाचार सामग्रीको खण्डन गरेको हो ।

केही दिनअघि कांग्रेस सभापति शेरबहादुर देउवा पत्नीसमेत रहेकी सांसद आरजू राणा देउवालाई १ घन्टा भए पनि पक्राउ गरेर थुन्न गृहमन्त्री रवि लामिछानेले प्रयत्न गरेको समाचार क्लिकमान्डुले सम्प्रेषण गरेको थियो । लामिछानेको दल रास्वपाका साथै प्रहरीका उच्च तहका अधिकारीले दिएको जानकारीलाई पुष्टी गर्दै समाचार सम्प्रेषण गरिएको हो ।

लामिछानेको ठाडो निर्देशनमा टीकापुर जग्गा घोटाला प्रकरणमा जोडेर आरजुलाई पक्राउ गर्न नेपाल प्रहरीको केन्द्रिय अनुसन्धान ब्यूरो (सीआईबी)को टोली शनिबार देउवा निवास बुढानिलकण्ठ पुगेको स्रोतको दाबी छ । तर ब्युरोले भने आरजूलाई पक्राउ गर्न गएको विषयको खण्डन गरेको हो ।

ब्युरोका प्रवक्ता प्रहरी उपरीक्षक होविन्द्र बोगटीद्वारा जारी विज्ञप्तिमा भनिएको छ, “ब्युरो प्रमुख तथा ब्युरोका सूचना अधिकारीसँग प्रहरी अनुसन्धान तथा कारबाही सम्बन्धमा भएका सत्यता परीक्षण नगरी आफूखुसी आमजनमानसमा भ्रम सिर्जना गरी अराजकता फैलाउने उद्देश्यले कपोलकल्पित समाचार बनाई अतिरञ्जित तवरबाट प्रकाशन तथा प्रसारण गरेको पाइएको हुँदा त्यस्ता आधारहीन र अपुष्ट समाचाप्रति यस ब्युरोको गम्भीर ध्यानाकर्षण भएको छ ।’

अपराध अनुसन्धानसम्बन्धी प्रगति विवरण तथा व्यक्ति पक्राउ सम्बन्धमा भएगरेका सूचना यस ब्युरोले नेपाल प्रहरीले अवलम्बन गरेको मिडिया नीतिको अधीनमा रही सूचना अधिकारीमार्फत सूचना प्रेषित हुँदै आइरहेको जनाएको छ ।

सीआईबीले भनेको छ, “कुनै अनुसन्धान तथा प्रहरी कारबाही सम्बन्धमा सत्यता परीक्षण नगरी भ्रामक, कपोकल्पित र आधारहीन समाचार प्रसारण तथा प्रकाशन नगरिदिनु हुन ब्युरो सम्पूर्ण सञ्चारकर्मीमा अनुरोध गर्दछ ।”