पाकिस्तानमा त्रिशालाले ‘रातो र चन्द्र सूर्य’ गाउने, प्रत्यक्ष प्रसारण हेर्न पाइएला ?

काठमाडौं । एसिया कप क्रिकेटमा आज नेपालले पहिलो खेल खेल्दैछ । १६औँ संस्करणको एशिया कप उद्घाटन खेलमा नेपाली गायिका त्रिशाला गुरुङले प्रस्तुति दिँदै छिन् ।

बुधबार दिउँसो ३:१५ देखि पाकिस्तानको मुल्तान क्रिकेट रंगशालामा उद्घाटन खेल हुँदैछ । त्यसअघि २:१५ देखि उद्घाटन समारोह हुनेछ । उद्घाटन समारोहमा त्रिशालासहित पाकिस्तानी गायिका आइमा बेगले प्रस्तुति दिने पाकिस्तान क्रिकेट बोर्डले जनाएको छ ।

त्रिशालाले ‘रातो र चन्द्र सूर्य’ गीतसहितको प्रस्तुति दिँदैछिन् । तर त्रिशालाको प्रस्तुती नेपाली दर्शकले प्रत्यक्ष प्रशारणमा भने हेर्न नपाउने भएका छन् ।
केही अन्तर्राष्ट्रिय प्रसारण नीतिका कारण उक्त गीतको प्रत्यक्ष प्रसारण नहुने गुरुङको भनाइ छ ।

यद्यपि, पछि उक्त भिडि‌ओ राख्ने भने उनले बताएकी छन् ।

‘हामी आज मुल्तान स्टेडियममा नेपाल र पाकिस्तानबीचको खेलको उद्घाटन समारोहमा छौं। दुर्भाग्यवश केही अन्तर्राष्ट्रिय प्रसारण नीतिहरूको कारण राष्ट्रिय गीत प्रत्यक्ष प्रसारण हुनेछैन तर हामी पछि अलग्गै भिडिओ पोस्ट गर्नेछौँ’ उनले भनेकी छन् ।